Paris Masters champion Djokovic

Novak Djokovic chuan player ṭha danglam bik a nihna a lantir leh ta. Pathianni zana khelh zawh tak Paris Masters final-ah world number 1 hian Grigor Dimitrov chu 6-4, 6-3 a hnehin a champion.

Tennis inelna huangah Grand Slam an ngaihlu ber, a dawtah chuan Masters Tournament hian ngaihhlut a hlawh - Serbian star hian Masters title ringawt pawh 40 a la tling ta, hetiang ti thei hmasa ber a ni hial.

Grand Slam vawi 24 champion tawh Djokovic hian final inkhel hi a thunun hneh viau, ni danga a tih fo ṭhin danin a hnung lam (baseline) aṭangin a inveng thiam a, a service a humhim ṭhat bawk avangin harsatna lian tham a tawk lo.

Dimitrov hian Djokovic-a service hi a chhuhsak thei lo a ni satliah lo, break point pawh a hmu lo. Final kalkawngah player ṭha Stefanos Tsitsipas hneh thei mah se Novak lakah chuan a ṭang zo ta lo a ni.

Kum 36 mi Djokovic chuan, "Tournament ka khelh ṭhat ber ṭum a ni lo, ka tan chuan chawlhkar hautak tak a ni a, chutiang chunga ka champion thei hi a lawmawm ka ti takzet," a ti a, season tawp lama result ṭha a nei chu lawmawm a tih thu a sawi bawk.

Tun season chhungin Djokovic hi hard court bikah a che ṭha zual hle, match 34 a khelh tawh zinga 33 tehmeuhah hnehna a chang thei. ATP Finals khelh hmabak an la neihah pawh champion tura rinkai ber a ni leh ang.

Mipa tennis ranking sang zual pariat ten an khelh ṭhin ATP Finals chu November 12-19 chhung hian Italy rama khawpui pakhat Turin-ah khelh a ni leh dawn a, champion lai chu Djokovic niin a vawi sarih nan champion a tum leh dawn a ni.