Gokulam-in Neroca an sawp

Pathianni zan I League inkhelah Gokulam-in goal li an khung a, Manipur club Neroca chu 4-1 in an sawp - Gokulam tan Osasuna striker hlui Álex Sánchez chuan goal hnih a khung a, goal khat zawk hi penalty aṭanga a chhuih luh a ni.

Sanchez bakah hian Barcelona tan pawha lo khel tawh midfielder Nili leh Nigerian forward Justine Ojoka Emmanuel te chuan goal khat ve ve an khung bawk. Neroca tan Sierra Leone international David Simbo chuan goal khat khung ve mah se, mualpho zualpui khuhna bak a tling zo lo.

Nimin inkhelah Inter Kashi chuan 4-2 in Namdhari an hneh a, I League-a an chak hmasak ber an tawng - Kashi tan Spanish striker Mario Barco chuan goal hnih khungin, Jordan Lamela Garrido leh Haobam Tomba Singh ten goal khat ve ve an khung a, Namdhari tana Harmanpreet Singh leh Imanol Arana Sadaba goal khungin awmzia a nei phak lo a, mahni mualah an tlawm.

Inter Kashi tan Edmund Lalrindika'n inkhel bul a ṭan a, Mario Barco goal khung hmasa zawk hi penalty aṭanga lut niin, Edmund-a hlawhchhuah a ni.