AIFF season bul ṭanna tur futsal

India rama football thuneitu sang ber All India Football Federation chuan season thar ṭan nan futsal championship buatsaih an tum a, Mizoram chu he inelnaa team thawh tura beisei an nih thu May 25 zana AIFF leh MFA inkawmnaah (video conferencing) AIFF chuan an sawi.

AIFF Futsal Club Championship hi Meghalaya-ah nghah a ni dawn a, a tirah chuan July-a neih tum ni mah se Covid-19 vangin August emaw September-ah neih theih beisei a ni. 

I League CEO Sunando Dhar chuan, "India ram futsal-ah chuan Mizoram hi hmahruaitu zinga mi in ni a, midang entawn in ni. Chuvangin inelna kan buatsaih turah pawh hian club in thawh theih ngei kan beisei," tiin Vanglaini a hrilh. 

AIFF Futsal Club Championship tia hming an pek inelnaah hian club 16 inel tura ruahmanna siam a ni a, Shillong khawpuiah kar thum chhung inelna hi neih tura tih a ni. 

Inelnaa tel tur hian I League, Indian Super League leh second division club-te chu a sawm tawh a, Bengaluru FC, FC Goa, Odisha FC, Kerala Blasters, Gokulam Kerala, Aizawl FC, TRAU, Rajasthan FC, Mohammedan Sporting leh ARA FC-te chuan an tel theih tur thu an tichiang tawh. 

League-cum-knockout tournament ni tura buatsaihah hian state tina futsal champion-te chu an tel thei dawn bawk a, India rama professional club hnuaia futsal team-te nen an inkhel dawn tihna a ni. 

Sunando Dhar chuan, "Aizawl FC nen pawh kan inbe tawh a, an tel theih tur thu min hrilh. Mizoram-in futsal league in nei a, in state champion an tel thei bawk ang," tiin Vanglaini a hrilh a, AIFF Futsal Club Championship hmasa berah Mizo club pahnih an awm dawn tihna a ni. 

Hetihlai hian Covid-19 vangin Mizoram Football Association lamin inelna a la kalpui thei lo a, MFA hnuaia futsal committee lam pawhin inelna an la kalpui theih rih loh avangin AIFF Futsal Club Championship-ah hian Aizawl FC baka Mizo club dang tel tur dang hi a la chiang thei lo.

MFA hnuaia futsal committee secretary Lalrinfela (Tekawka) chuan, "Covid-19 vangin engmah sawi chian theih a la ni lo a, MFA Executive Committee-in ruahmanna a siam hunah kan kal dan tur a chiang ang," tiin Vanglaini a hrilh. 

MFA Futsal League hi April-May chhunga buatsaih tum ni mah se, Covid-19 vanga ṭhulh a ni a, MFA-in season kal zel dan a rel chian hunah MFA Futsal League chin tur a hriat theih ang.

AIFF chuan Futsal Club Champion-ship-ah hian ram pawn player an tel loh tur thu an sawi a, hetih rual hian Indian player langsar ni ṭhin zingah inelna hmachhawn tur an awm mai thei?

Tun dinhmunah chuan player langsarte karah IM Vijayan leh Bhaichung Bhutia-te hming pawh sawi rik a ni a, anni ang player langsar ni ṭhin an inlan chuan inelna hian nasa takin ngaihven a hlawh lehzual ang.

Sunando chuan, "Legend-te an inlan theih chuan kan inelna a hlut phah lehzual dawn. Gokulam tana Vijayan-a inlan theih a, East Bengal tana Bhaichung a inlan theih bawk chuan fans tam takin en an châk dawn a ni," a ti. 

Kum 2016 khan India rama futsal inelna langsar hmasa Premier Futsal chu India ramah neih a ni a, mahse he inelna hi AIFF hriatpui a nih loh avangin a hnu rei loteah tihtawp a ni. 

AIFF hian February, 2018 khan India rama futsal kal zel dan tura ruahmanna a puang a, AIFF Futsal consultant atan Dinesh Nair chu ruatin Aizawl-ah pawh a rawn kal a;nimahsela an ruahman angin ram pum huap inelna bul an ṭan thei lo.

AIFF hian futsal mumal zawka kalpui a, nakina AFC competition-ah te tel ve theih turin a hnuaia state-te pawh futsal league nei turin a ngen a, nikumah khan state pariat thlanchhuah bik Kerala, Goa, Maharashtra, West Bengal, Meghalaya, Jammu & Kashmir, Mizoram leh Karnataka-te chu futsal league buatsaih turin a ti. 

AIFF hnuaia futsal league hmasa ber chu MFA Futsal League a ni a, MFA chuan January 2018, khan India rama futsal inelna hmasa ber hi kickoff a nei. 

MFA Futsal League hmasa berah hian Chanmari Zothan Futsal chu an champion a, nikumah khan an nomawi kawl lai humhimin 2018 final-a an hneh hnu Chhinga Veng FC bawk hnehin an champion nawn. 

AIFF Futsal Club Championship neih a nih hunah MFA-in futsal league champion thar a neih hman dawn leh dawn loh hriat a ni lo a, Chanmari tan Mizoram aiawhna chance a sang hle. 

Sunando chuan, "Inelna buatsaih tur hian nikum aṭang khan hma kan la tawh a, mahse Covid-19 in engkim a tibuai ta a ni. Theihtawp chhuahin hma kan lak chhunzawm a, kan hlawhtlin theih ngei kan beisei," tiin Vanglaini a hrilh. 

Coronavirus vanga infiamna khawvel dinhmun a chian theih loh avangin AIFF hian futsal championship buatsaih tum mah se Covid-19-in thui takin hma hun a hril dawn tih a chiang a, AIFF hian a beisei anga season bul a ṭan thei lo a nih pawhin a mak lo ang.