Lyon president-in inkhelh leh a duh

Lyon president Jean-Michel Aulas chuan French Ligue 1 an tihtawp mai chu a hrethiam thei lo a, an rama football inelna sang ber hi khelh chhunzawm leh theih ni se a duh thu a sawi.

Covid-19 vangin France ramah September thla hma chuan mipui punkhawmna lam chi neih phal a ni lo. April 28 khan Ligue 1 leh Ligue 2 chu tihtawp a ni a, hri leng vang hian Dutch leh Belgian league te pawh an lo titawp tawh bawk.

Ligue 1 an tihtawp lai khan Lyon hi table-ah pasarihna an ni a, hun rei tak hnuah European football an khel phak dawn ta lo. Match khelh hmabak an la neih khel zo se chuan tun aia sang deuha awm chunga season hman zawh theih an beisei a ni.

Jean-Michel Aulas chuan, "Bundesliga chu May 16 aṭangin an khel leh tawh, Spain-ah pawh June 9 aṭangin an inkhel leh dawn. Italy, Russia leh Portugal-ah te chuan a huhoin training an nei leh tawh; England pawh June 19 velah inkhelh an tum.

"Eng vangin nge France hian ram chhunga football inelna sang hi hma takah a tih tawp mai bik tih hi ka hrethiam lo, dawhthei hret ila chuan sorkar lam pawhin inkharkhipna hi tlem tlemin a thlah dul chho zel a ni," a ti.

Lyon bakah hian Ligue 2 lama an tlaktir pahnih Amiens leh Toulouse te pawhin an dikna chanvo ang tawk an hmu lo niin an ngai a, court lamah thubuai an ziak lut tawh.