Cherries keeper Ramsdale-a'n Covid-19 kai

Premier League club Bournemouth goalkeeper Aaron Ramsdale chuan Covid-19 a kai thu a sawi a, kar hmasaa Premier League-in test vawi hnihna a kalpuia Covid-19 kai mi pahnih an awm thu a puan zinga pakhat zawk kha a nih thu a sawi. 

Kar hmasaa Premier League-in Covid-19 test second round a kalpuiah khan player leh staff 996 chu endik an ni a, an zinga pahnih chuan Covid-19 an kai thu 

puan a ni. 

Ramsdale chuan he hri leng a kai thu hi sawiin a rawn inpuang a, hetih rual hian hri kai dang pakhat erawh he thu buatsaih a nih thleng hian a hming hriat a la ni lo. 

Kum 22 mi goalkeeper chuan, "Hriatthiam a harsa a, thil mak tak zawng a ni. Tu mah hnaih loin theihtawpin ka awm hrang a, heti chung hian hri chu ka lo kai reng si," a ti a, ni sarih chhung chu khunghran a ni dawn. 

Tun season-a Cherries tana league match 27 khel tawh chuan, "Dan an zam ang zawng zawng chu ka zawm vek a, dawra kal a ngaih changin ka kal zauh chauh a ni. Chuti chung chuan ka lo kai reng si a, ka hriat tirh phei chuan hlauthawng tak ka ni," a ti. 

Premier League-in Covid-19 test first round-a kalpuiah khan Watford defender Adrian Mariappa leh Burnley assistant manager Ian Woan-te chuan hri hi an kai tih hmuhchhuah a lo ni tawh. 

English top flight league hian coronavirus tests third round result chu vawiin hian an puan rin a ni.