Mizoram tan Valtea'n silver medal a la
Zorammuana chuan National Games 2023 neih laia boxing huangah silver medal a hnek chhuak. Mizo tlangval hi under 51kg huangah a khel a, gold medal inchuhna inhnekah vanduai zawk ni mah se pahnihna dinhmun a luah phak tho.
Nimin khan Goa-ah inelna hi neih niin, Tuipui tlangval Zorammuana (Valtea) hian Services Sports Control Board boxer Bishwamitra Chowgatham chu unanimous decision (5-0, 4-1, 5-0) in a hneh lo. Final kalkawngah hian Haryana boxer Yogesh leh Goa tlangval Roshan Zamir te a hneh a ni.
Valtea chuan, "Mizoram tan theihtawp ka chhuah a, India ram pum huap inelnaa medal ka la ve thei hi ka lawm takzet. Gold medal ni ta chiah lo mah se silver medal hi lawm takin ka pawm a, inelna dang ka hmachhawn leh thei a nih chuan tun aia ṭhain tih ka tum ang.
"Semifinal-a Zamir ka hneh ṭum khan ka ban vei lam a hliam deuh a, hei hi final-ah ka tuar. Ka hnek chhuah dawnin a na ṭhin a, chuvangin ka ṭhat dan berin final ka khel thei ta chiah lo," tiin Vanglaini a hrilh.
Mizo tlangval Valtea hian kum 2015 aṭangin boxing a khel ṭan a, tualchhung boxing inelnaah chuan district hrang hrang inelna huangah a khel tawh. Kumin tir lam khan Senior National Championship a khel a, silver medal lain National Games hi a khelh theih phah ta a ni.
Mizoram boxing coach Lalngaihawma Ngente chuan, "Valtea thlen chin hi a sang kan ti hle, semifinal-a hliam a nei kha a hnuah a tuar hi pawi kan ti takzet a, nidanga a inhnek ṭha tak ang kha kan hmu thei tawk lo a, a che a ti muang ta deuh a ni. Silver medal a dawng phak erawh sawi nep chi a ni lo," tiin Vanglaini a hrilh.
National Games 2023 hi vawiinah khar a ni dawn, inelna tawp ni hian Mizoram aiawhin Fabian Lalrinliana chu 10m shooting-ah a la inlan dawn a, ani chauh hi Mizoramin infiammi inlan tur a neih a ni tawh - midang chuan an zo vek tawh.
Mizoram hian medal panga a la tling ta chiah. Weightlifting leh taekwondo huangah gold medal pakhat ve ve a la a, taekwondo hian silver medal pahnih an lak tel bakah boxer Valtea'n silver medal a rawn hnek chhuak bawk.