Thangpuia leh R. Puia tan Gold

37th National Games mipa football-ah Mizo tlangval Zothanpuia (Thangpuia) leh Roluahpuia ten Services gold an lakpui. Nimin khan football final hi Fatorda, Goa-ah an khelh a ni a, Services hian 2-1 in Manipur an hneh. Hmeichhe inelnaah Grace Lalrampari'n Odisha chu gold a lakpui tawh bawk.

Services hi group A-ah Santosh Trophy champion lai Karnataka, Punjab leh Goa te nen group khatah awmin an group-ah pakhatna an ni. Semifinal-ah Services hian Kerala 4-2 in an hneh.

Final-ah MPL hmasa pahniha best defender chawimawina dawngtu Thangpuia'n bul a ṭan a, inkhel dang ang thoin captain Christopher Kamei a pawimawh. Christopher hian ṭha zetin box pawn chiah aṭangin a goal hmahruai a khung.

Minute 40-naah Manipur tan hijam Sanathoi Meetei-a'n a sut. Second half-ah Manipur an khel ṭha a, mahse Services an vannei. Right back Shafeel cross an dan per chu goal-ah a lut a, minute 62-naah 2-1 a ni. Hemi hnu hian goal a luh belh lo a, Services-in Manipur hnehin National Games-ah gold medal an la.

Services hian National Games-a gold medal an lak hma hian Santosh Trophy an khel a, Mizoram nen group khatah awmin group hmahruaitu nichungin final round an lut a ni. Santosh Trophy Final Round hi nakkum February thla hian Arunachal Pradesh-ah khelh a ni ang.