AIFF Secretary General an ban

India rama football thuneitu sang ber All India Football Federation (AIFF) chuan nimin khan an secretary general Dr. Shaji Prabhakaran chu a hna aṭanga chawlhtir a nih thu an puang.

AIFF chuan, Dr. Shaji ban a nih chhan chu a chunga rinna an nghah ngam tawh loh vang a nih thu an sawi a, a bak chiang taka sawina erawh a awm lo. Shaji thlaktu tur ruat a nih hma chu AIFF deputy secretary ni lai M Satyanarayan chuan Secretary General hna hi a chelh dawn a ni.

Dr. Shaji hi AIFF president Kalyan Chaubey chuan amah ngeia hmuin, ban a nihna lehkha hi a pe nia sawi a ni a, Vanglaini chuan Dr. Shaji hi be zui mah se, Shaji chuan, "Nakinah ka la sawi ang. Tun atan chuan engmah ka sawi thei rih lo," a ti a, a hnu lawkah X lamah chuan, "Team angin hna kan thawk ho a, ban ka ni ta mai hi mak ka ti hle," tiin a ziak - rinawm lo anga puh a nihna chu a pha bawk.

Chaubey hoa AIFF dinthar tura hmalak a nih ṭan, nikum September aṭang khan Shaji hi AIFF Secretary General atan ruat a ni a, mahse, tun hnaiah AIFF President nen hian neuh neuh an nei ṭan a, tun dinhmun an thleng ta.

AIFF executive committee chu vawiin hian an ṭhu dawn a, Asian Football Confedeeration-a executive committee member ni lai Dr. Shaji ban a nih chungchang leh hmalak zel dan tur chu an thurel tur zingah a tel ang.