Barcelona an tlawm - Pepe a la tar lo!

Thawhlehni zan Champions League inkhelah Barcelona-in awlsam taka hnehna chang turah inngai mah se rin loh result an hawn a, Ukrainian club Shakhtar Donetsk chu khualmualah 1-0 in an ngam lo.

Ukraine buai vanga mahni khelmuala home match pawh khel thei lo Shakhtar hian Danylo Sikan hmangin inkhela goal awmchhun an khung a, Barca-in a chhanletna tur an neih loh avangin tun season Champions League-ah a vawi khat nan an tlawm.

Group H inkhel dangah FC Porto chuan 2-0 in Royal Antwerp an hneh a, Porto tan Evanilson chuan goal hmahruai khungin, hun pek belhah Pepe chuan chakna goal a khung - kum 40 mi Pepe hi Champions League-a goal khung thei upa ber a ni nghal.

Barca an chuai

Hamburg khawpuiah hnehna chan beiseiin Barcelona an lenglut a, mahse, Xavi enkawl team hian inkhel an thunun chungin goal an khung thei lo - minute 40-naah Sikan chuan Giorgi Gocholeishvili ball cross chu a tauh lut a, 1-0 in hma an hruai der.

Shakhtar tan Newerton chuan chak nemnghehna goal a khungah a inngai a, mahse, kum 18 mi Brazilian winger goal khung hi offside vanga pawm a ni lo a, Barca mualpho lutuk tur a ziaawm hret.

Barca hian Ukrainian club lakah hian point hlawh chhuak ni se, round of 16 khel tura tlang mai tur an ni a, mahse, rin loh takin an tlawm - October 28 zana FC Porto an mikhual huna an tlawm loh chuan a thiam 16 zingah an hming ziah kaiin a awm tho ang.

Porto tan Pepe

FC Porto-in Champions League round of 16 luh an tum tih khelmualah an pholang a, an mikhual Royal Antwerp chu 2-0 in an hneh - minute 32-naah Evanilson chuan penalty hmangin goal hmahruai a khung a, minute 52-naah Antwerp defender Jurgen Ekkelenkamp chu hnawhchhuah zui niin, hun pek belhah Pepe chuan chak nemnghehna goal a khung.

Real Madrid defender hlui Pepe hi kum 40 leh ni 254 mi niin, Champions League-a goal khung thei upa ber record a siam a, kum 38 leh ni 59 mi nia record chelhtu Francesco Totti record chu a khum.

Pepe hi goalkeeper ni lo zinga Champions League-a inlan thei upa ber a ni bawk a, player hrim hrimah chuan Lazio goalkeeper Marco Ballotta chuan December 2007 khan Real hmachhawnin, kum 43 leh ni 252 mi ni chungin record a lo siam tawh.