Dortmund, PSG, Milan leh Newcastle : An chiang vek - An chiang lo vek!
Champions League group khata awm tur pawh a nih khan group F chu 'Group of Death' tih a ni. Team awmte an intiattawk hlawm hle a, chuvangin a tlang thei tur ber hriat a harsa - match li ṭheuh an khelh hnuah pawh tling thei vek an ni a, tla thei vek an la ni bawk.
Thawhlehni zan inkhelah AC Milan chuan Rafael Leao leh Olivier Giroud te goal hmangin an mikhual Paris Saint Germain chu 2-1 in an hneh. Group F inkhel dangah Borussia Dortmund chuan Newcastle United 4-0 in an hneh ve bawk a ni.
Group match vawi li an khelh tawhah Dortmund hian point sarih hmuin table hmahruaitu an ni a, an hnuaiah hian point nga hmutu PSG awmin - AC Milan (5 points) leh Newcastle (4) te pawh an la tling thei - match hnih ṭheuh an la hmabak.
Milan an chak
San Siro boruak a nung ṭhin a, inkhelh ṭan hma aṭangin social media lama inbeihna a nasa nghal. Milan fans lam chuan an club chher chhuah goalkeeper Gianluigi Donnarumma chu pawisa lema an lo vawm tur thu an sawi, sum vanga PSG panah an ngai.
Inkhel an ṭan a, team pahnih an inhlau loin an innawr na nghal. Corner aṭanga ball kal Marquinhos-a tauh pial chu hnai tak aṭangin Milan Skriniar chuan a tauh lut, minute kuana lekah mikhual lamin goal an nei nghal.
Milan an awm mai mai bik lo, striker Giroud-a shot chu Donnarumma-a'n lo dansak mah se, ball per hi Leao chuan a bin (overhead kick) lut nghal daih, minute thum chhung bal goal an phung duh bik lo - Portuguese forward hi PSG tan a hnawksak zui.
Kylian Mbappe a hlauhawm a, defender karah a rawn dawk chhuah zauh ṭhin. Mahse, France captain hian keeper Mike Maignan chauh a hmachhawn tawhah a khung lo, a pet hman tura ngaih a pet fuh hman tak loh bawk avangin a hun ṭha a luangral.
Second half tir lamah Milan tan Giroud rawng ding chhuakin, an ven karah an goal hnihna a tauh lut - Giroud ball tauh dang thei lo Donnarumma hi fans lamin an au el nasa, a hnuah erawh Theo Hernandez and Fikayo Tomori te khung tur erawh ṭha takin a dansak thung.
Magpies chak lo
Premier League lamah Arsenal an hneh avangin Newcastle United an phur a, mahse Champions League lamah erawh an result ṭha an chhawmnung thei lo - Mapies tan UCL last 16 luh theihna kawng la inhawng mah se a hautak tawh dawn.
Signal Induna Park-a inkhelah Dortmund tan Niclas Fullkrug chuan hnai tak aṭangin goal hmahruai a khung a, second half tawp lamah counter attack hmangin Julian Brandt chuan an goal hnihna leh chak nemnghehna ni bawk a khung.
Newcastle tana goal khung theihna remchang ṭha ber chu Joelinton-a'n a hlah a, midfielder Joelinton hian Tino Livramento-a cross chu yard nga leka hnai aṭangin a tauh lut lo, a bul an ṭan fuh loh avangin a tawp thlengin an tho chhuak thei ta lo a ni.
Newcastle manager Eddie Howe chuan, "Kan ṭhat dan bera kan khel chhuak thei lo kha a pawi. Joelinton-a'n a tauh lut lo kha a makin a uiawm hle, khatiang chiah khan ball hmu leh se la chuan a tauhlut tawh ang," a ti a, last 16 lut turin beisei an la nei tih a sawi bawk.
German club Dortmund manager Edin Terzic chuan, "Newcastle United hi team ṭha leh mikhual châkawm lo tak mai an ni a, chutichung chuan vawi hnih kan hneh ta, player zawng zawngin an khel ṭha," a ti. Magpies muala an inkhelh ṭum khan si khat faiin an lo chak tawh bawk a ni.