Semifinal lut tura team dinhmun

Tling tawh: India, South Africa leh Australia an tling tawh. Pahnihna leh pathumnaa awm South Africa leh Australia hi semifinal-ah an inhmachhawn dawn.

Semifinal beiseina la nei: New Zealand, Pakistan leh Afghanistan. Ram pathum zinga invaw tling hian semifinal-ah India an hmachhawn ang. Nimin inkhel result a zirin Netherlands tan beisei tur a la awm a, amaherawhchu a tak ramah chuan semifinal an tlin a rinawm loh.

Australia: Aussies hian thilmak an thlentir. Dinhmun derthawng taka an din hnuah Afghanistan an hneh avangin match khat khelh hmabak nei chungin an tling.

New Zealand: Australia an chak avangin Black Caps dinhmun a ṭha nghal a, an kutah engkim a awm ta. New Zealand hian NRR an nei ṭha a, vawiina Sri Lanka an hneh chuan an tlingah a ngai theih ang. Chutihrualin NRR en tur a nih avangin inkhel dang result erawh an ngaihchan a ṭul dawn.

Afghanistan: Inelna ṭan hmaa semifinal lut tur zinga ngaih loh Afghanistan dinhmun a ṭha hman viau a, mahse Australia laka an chetsual leh tak si avangin beiseina tham ral a ni ber. Afghanistan beiseina chu New Zealand leh Pakistan te an match hnuhnung berah chak lo se tih a ni a, chak an awm a nih chuan match tawp berah South Africa uchuak taka sawp a ṭul dawn. Beisei ngam chi a ni lo ang.

Pakistan: Shaheens hian vawiina New Zealand leh Sri Lanka inkhel an thlir uluk khawp ang. Lions an chak a nih chuan Pakistan hian beiseina nung an nei dawn. Chutihrualin Black Caps an chak a nih erawh chuan Babar Azam-a hote hian group match hnuhnung berah England an sawp nual a ngai dawn. Chhiarkawp danin theih ni mah se cricket hrechiang chin chuan thil theih lohah an ngai thung ang.