Bagan tlawm zanah Odisha chak

Thawhlehni zan khan AFC Cup-ah Indian club pahnih Mohun Bagan leh Odisha FC an inlan a, Bagan-in khualmualah 2-1 a Bashundhara Kings an ngam loh laiin, Odisha erawhin Maziya S&RC chu 3-2 in an hneh thung.

Bagan hian league match hmasa pahnihah hnehna changin, an match thum khelhnaah Bashundhara hi 2-2 in an inhnehtawkpui a, khualmualah 2-1 in an ngam lo zui. Kolkata club tan Liston Colaço chuan goal hmahruai a khung a, chak an beisei.

Mahse, Bangladesh club ṭha tan Miguel Figueira leh Robinho ten goal khat ve ve an khung a, hun tawp thlenga goal dang lut loin Bashundhara an chak daih.

Thawhlehni zan inkhel dangah Odisha chuan Maldives club Maziya hmachhawnin, 2-0 ngawtin an hnufual hman - Maziya khelmuala inkhelah hian Naiz Hassan leh Vojislav Balabanovic ten goal khungin, 2-0 in Maziya hian hma an hruai a, goal dang lut loin chawlhlawk hman a ni.

Mahse, second half-ah Odisha tak tak inlarin, Mourtada Fall, Diego Maurício leh Roy Krishna ten goal khat ṭheuh an khung a, goal dang lut tawh loin, 3-2 in Odisha hi an chak.

Odisha tan K. Lalṭha-thanga, Jerry Lalrinzuala, Isak Vanlalruatfela leh Laldinliana Renthlei ten inkhel bul an ṭan a, Jerry Mawihmingthanga chu minute 46-naah bench aṭanga luhtir a ni bawk.

AFC Cup-ah hian group D-ah Bagan leh Odisha hi an awm ho a, an group aṭangin hmahruaitu chu knockout round lut tur awmchhun an ni - Bashundhara hian match liah point sarih hmuin hma an hruai mek a, Bagan (7 points) leh Odisha (6) ten an hlat lo.