Al Ittihad-in Nuno an ban

Wolves leh Tottenham manager hlui Nuno Espirito Santo chu Al Ittihad-in a ban. Saudi Pro League club-in Nuno an ban chhan hi an player langsar Karim Benzema nen an inhmuh thiam loh vanga sawi a ni.

November 6, Thawhṭanni khan Al Ittihad-in AFC Champions League-ah Iraqi club Al Quwa Al Jawiya an tlawh a, 2-0 in an chak lo. Halftime-ah 1-0 a ni a, Nuno hian, "Player ropui tak i ni a, mahse khingpuite 'pressure' pek kawngah i thatchhia," tiin Benzema hi a sawisel.

Benzema hian ngawih chuh loin, "Keimah chauh ni loin, team pumpui chungah sawi rawh," tiin a chhang. Coach Nuno thinrimin, "Team-ah hotu i ni a, player dang enawn tur i ni a, player pawimawh ber i ni. Chuvangin nangmah mawhphurhna i lak a ṭul," tiin a sawi a, thu tam tak a sawi tel mah se Benzema hian coach thusawi hi a pawm lo.

Tuna an buaina inṭan hma kar hnih liam taah Benzema hian club hotute hnenah Nuno hi club tana a ṭhat tawk loh thu a sawi bawk. Team chhungah buaina a awm avangin Al Ittihad hotuten thutlukna an siam a ngai a, khawvel striker ṭha ber zinga mi Benzema chunga hremna lekkawh loin coach Nuno ban an thlang ta zawk.

Al Ittihad hi team 18 awmna Saudi Pro League-ah paruknaah an awm mek a; Benzema, Fabinho, N'Golo Kanté, Jota leh Luiz Felipe ten manager thar an nei thuai ang.