West Ham tan insiam ṭhat hun

Tun hnaiah West Ham an che chhia - zanin dar 1:30 hian Olympiacos nen Europa League group match an khel dawn. David Moyes leh a naute tan insiamṭhat a ngai, an tlawm a nih chuan an manager dinhmun thlengin a tuar thei dawn niin a lang.

October thla tir khan Hammers hi Premier League-ah Newcastle United nen an inhnehtawk, a hnuah Arsenal chu League Cup aṭangin an pet chhuak. Mahse, league leh European football an khelh dang zawngah chuan an tlawm vek!

Zanina an tum tur Olympicos mualah 2-1 a chak loin, league lamah Everton leh Brentford te an ngam lo, khawthlang chanchinbumite chuan Moyes chu ban mai theih dinhmunah a ding niin an sawi, club leh manager tan zanin inkhel hi a pawimawh hle.

West Ham hian defender Kurt Zouma chuan an match hnuhnung ber la khel thei lo mah se zaninah chuan a inlan theih tawh a rinawm a, an player pawimawh a lo kir an beisei bakah Lucas Paqueta leh Edson Alvarez ten hremna an hmang zo tawh - an phur phah ngei ang.

Season kal laiah Jarrod Bowen leh James Ward-Prowse te hi West Ham innghahna pawimawh an ni. Anni pahnih hi Olympiacos tlarhnung tana ven ngun ngai bik tur an ni a, striker tawnhriat ngah Michail Antonio mawhphurhna a sang bawk ang.

Tun hnaiah West Ham hi khel ṭha lo mah se Olympiacos hi an hneh thei a nih chuan, group match vawi li aṭangin point kua an hmu dawn tihna a ni a, group stage paltlang turin an dinhmun a ṭha daih thei. Moyes-a'n chak ngei tumin a player ṭha a chhawr a rinawm.