Premier League ti hmuhnawmtu goal khung tur siamsaktute

Football-ah goal a pawimawh a, goal awm theihna tura siamsaktute hi an pawimawh bawk. Goal khung tur siamsaktute hi ball pass thiam bik te, ball thiam tak te leh remhre takte an ni ṭhin. Chutihrualin tlarhmaa awm striker-te hian goal an hnaih avangin assist an ngah viau bawk.

Tun ṭumah hian Premier League-a khelhpuite siamsak hnemte kan rawn pholang a, midfielder hmuhnawm tak tak hming a lang hnem hle. Premier League-a assists ngah ber chu Ryan Giggs a ni a, a hun laia English club ṭha ber Manchester United tan chauha a khelh avang leh a khelh rei avangin assist a ngah ber tihin a sawi theih. Giggs hian assists vawi 162 zet a nei a, amah hnaih bertu Cesc Fabregas pawhin vawi 111 chauh assists a neih avangin a record hi khum a ni lawk dawn lo.

Premeir League chanchina hming dai tawh loh tur David Beckham hian ball pet thiam vangin a hming a chher a, England mipui chhuanpui thamin a ke dinglam a hmang thiam. 2002 World Cup hmaa Beckham a ke dinglam hliam lar zia te kha sawiin a siak lo a, English midfielder hian 1998 World Cup-a amah diriamtute (Argentina nen an inkhelh ṭumin red card a hmu a, England an chak lo) kha a ball pet thiamna hmangin a lam ṭangah a siam vek.

Beckham hian season thum assist ngah ber a ni a, ding lama aṭanga a ball vawrh ṭha tak Andy Cole, Dwight Yorke, Ruud van Nistelrooy leh player dang dangin goal-a an chantir pawh a hun lai hre pha chuan an mithla nghal thei ang. Beckham hi tunah chuan kum 45 mi a ni tawh a, chutichung chuan May 2-a pianchampha a rawn thlen khan khawvel hmun dang chu sawi loh whatsapp leh facebook aṭangin Mizote zinga a tlak nat zia chu a la lang thei a ni.

Barcelona academy chhuak Cesc Fabregas inkhel en tawh chuan anthiamna an hmu fuh ngei ang. Cesc hi La Masia 1987 batch a ni a, Lionel Messi-a'n academy a rawn zawn hma chuan a thiam ber tiha an sawi a ni.

Kum 16 mi lek a nihin Arsenal a zawm a, midfield lai a thunun hneh ṭhin hle. Cesc hian Arsenal-ah hming a chher a, Spain leh Barcelona tana khelhpuiten nasa taka an thlem avangin a inzirchhuahna Catalan club-ah a let. Cesc hian Chelsearawn zawm lehin hetah pawh a thiam thil a theihnghilh lo a, Arsenal ṭantute rilru erawh a ti na thung.

FIFA World Cup-a Germany champion puitu Mesut Ozil hi Schalke aṭanga inzir chhuak a ni a, Real Madrid tana a khelh hnuin Arsenal-ah a vul. Kum 31 mi Ozil hi a khelh ṭhat ni leh chhiat ni a inthlau deuh a, a chetfuh ni chuan a khingpuite ṭantute pawhin ka ang haua en tur hi a ni ve hrim hrim.

Fabregas leh Ozil te ang thoin Juan Mata leh David Silva te pawh hi player hmuhnawm tak an ni a. 1998-99 season-a assist nei ngah ber Dennis Bergkamp chanchin ziah thui a châkawm a, chutiang bawkin tun laia midfielder ṭha ber tiha chhal theih zinga mi Kevin De Bruyne hming lam hmaih a thiang lo.