Nagelsmann hote tan fiahna a ni zel

Zanin hian Bundesliga inkhel a awm dawn a, zan dar 10:00-ah RB Leipzig-in Hertha BSC an mikhual dawn. RB Leipzig hi manager naupang Julian Nagelsmann-a enkawl a ni a, Bundesliga-ah pathumnaah an awm mek.

Hoffenheim pawhin zanin dar 10:00 hian FC Cologne an mikhual dawn a, Mizorama rawn inkhel tawh team hi an chetsual ngun avangin Champions League khelh a beiseiawm tawh lo. Nagelsmann-a chhuah hnuah Hoffenheim an tlahniam te pawh a tih theih ang.

Kum 32 mi Julian Nagelsmann hi footballer hlawhtling a ni lo a, naupan lai chuan Bundesliga club 1860 Munich leh Augsburg te youth team-ah pawh awm ṭhin. amaherawhchu khup hliam vangin football career a tawp hma a, hemi avang hian manager turin rilru a siam nghal.

University-ah Business Adminis-tration a zir a, semester li zen zawn a zir hnuah Sports Science-ah a inlet a. Hemi hnu hian coaching-ah kalin a club hlui Augsburg-ah letin Thomas Tuchel hnuaiah pawh hun rei lote a inzir.

Nagelsmann hi Lionel Messi te nen kum khat chhuak an ni a, kum 25 a nihin Hoffenheim youth team a enkawl tawh. Mini Mourinho tiin hminglem an vuahsak a, Hoffenheim U19 hi  2013-14 season khan U19 Bundesliga-ah a champion pui. 

Kum 2016 aṭangin Hoffenheim senior team a enkawl a, kum 2017-ah phei chuan German Football Manager of the Year-ah thlan a ni hial. 

Chona thar hmachhawnin Nagelsmann hian tun season ṭantirh aṭangin RB Leipzig a enkawl ṭan a, Germany football thununtu Bayern Munich an chhaih buai pha - hei hian tu nge a nih a sawifiah.

RB Leipzig hian season ṭha tak an hmang a, amaherawhchu match hnuhnung paliah vawi thum an inhnehtawk. Point 12 hmuh theih turah a chanve chauh an hmu a, point ruk an chan avangin hmahruaitu Bayern Munich point sarih an pha lo.

Nagelsmann hote tan Bundesliga nomawi chawi turin hmabak a hautak tawh a, chutiang bawkin season thara Champions League khel turin ṭan mar a ṭul. RB Leipzig hi an chesual a nih chuan pathumnaa awm mek chung siin match khat lekah pangnaa tla thei an ni a, Hertha BSC nen an inkhelh hunah ṭan mar a ṭul khawp ang.

RB Leipzig hian an match hnuhnung berah Mainz 5-0 in an sawp a, hemi ṭum hian an star striker Timo Werner-a'n hattrick a siam. Nagelsmann-a hote hi chak ngei tur a ni a, mipui mit fukna tur chu German striker Werner a ni ang.