French Open khelh an la beisei

Tennis inelna lian French Open chu favang laia khelh tumin hma an la zel a, tournament director Guy Forget chuan hun chep tak karah pawh inelna neih theih an la beisei reng thu a sawi chhuak.

Guy Forget chuan, "Tun dinhmunah chuan khelh theih kan la beisei reng, tun aṭanga rei vak lo hnuah chuan bazarna leh thil zawrhna hmun ṭhenkhat pawh an inhawn chhoh zel ka beisei.

"Tun aṭanga thla hnih emaw thla thum hnuah eng nge rawn thleng dawn chu kan hre lo, ka hmuh dan chuan thil hi a beiseiawm zawng zelin a kal," tiin a sawi.

France prime minister Edouard Philippe chuan September thla hmalamah chuan an ramah infiamna lian tham buatsaih an remtih loh thu a sawi tawh a, football inelna Ligue 1 leh a hnuaia awmte pawh tihtawp a nih phah.

May thla a khelh tur French Open hi September 20 aṭanga khelh turin an sawn a, August thla tawpa khelh tur US Open chu a hun sawn a ngai mai thei bawk - inelna lian pahnih hi a insut buai loh nan hmalak mek a ni.