National Games a ṭiak: Mizoramin medal panga a la
India ram pum huapa infiammite intawhkhawmna lian - National Games 2023 chu Ningani zan khan a hmawr bawk a ni. Mizoram chuan gold medal pahnih leh silver medal pathum, a vaiin medal panga lain inelna an hmang zo.
Goa khawpuia inelna neihah hian team 37 tel tura beisei an tel thei a, infiamna peng hrang 43 laiah inelna neih niin Mizoram hi infiamna chi pasarihah an inlan thei - ram pum aṭangin infiammi 10,000 chuang an pungkhawm a ni.
State hrang hrang leh UT inlan zingah team 34 ten medal an la thei. Ladakh leh Meghalaya te chuan medal an la phak lo. Hmarchhak state zingah Manipur chu che ṭha berin gold medal ringawt pawh 30 an la tling a, a pumpuiah medal 82 an la phak.
Mizoram hian National Games hmasa khan judo leh boxing huangah medal a la, kuminah a medal lak zat hi a pung - hmasawnna duhawm tak a ni. Chutihrualin, Mizoram hi a pumpuiah 27-na a ni a, state dangte chet dan ngaihtuahin hmasawnna tur a la tam.
Mizoram Olympic Association President, tun National Games atana Mizoram contingent Chef De Mission ni bawk V. Lalzawmliana chuan, "Hma kan sawn avangin kan lawm a, Mizoram tana medal hlawh chhuaktu zawng zawngte ka lawmpui takzet, chutihrualin medal tally kan en chuan hmasawn kan ngai hle.
"National Games khel phak tur hian paltlang ngai hautak tak a awm. Mizoramin inelna pasarih chauh kan hmachhawn thei hi a uiawm, sports association hrang hrangte pawh India huap inelna hmachhawn thei tura inbuatsaih theih a pawimawh," tiin Vanglaini a hrilh.
Mizoram tan hian Lalthlamuanpuia, H. Vanlalfela leh Daniel Lalhumthanga te chuan taekwondo men's group poomsae-ah gold medal lain Lalhunthara chuan weightlifting (67kg) inelna huangah gold medal a chawi chhuak bawk.
Boxer Zorammuana chuan silver medal lain, ani bakah hian Lalthlamuanpuia chu taekwondo poomsae Individual category-ah pahnihna niin, taekwondo tho poomsae mixed pair-ah Vanlalhmangaihthangi leh Daniel Lalhumthanga te inkawp chuan silver medal an la bawk a ni.
October 26 aṭanga November 9 chhunga neih National Games 2023-ah hian a ti ṭha ber Maharashtra chuan medal 228 tehmeuh an la a, team dangin an elphak lo hle.