Odegaard dinhmun la chiang lo

Arsenal chuan zanin dar 8:30 hian Premier League khel turin Burnley an mikhual dawn, an captain Martin Odegaard chu a inlan thei dawn nge inlan thei dawn lo a la chiang lo a ni.

Odegaard hi tun hnaiah hliam vangin a chawl mek - West Ham nen an inkhelh ṭumin inlan ve zuai mah se a inkhel thei lo, a hnua Newcastle United leh Sevilla an hmachhawn ṭumin a inlan lo.

Inkhel thei loin awm mek mah se Norway chuan Faroe Islands leh Scotland hmachhawn tur an team an puan zingah Odegaard hi a tel. Gunners manager Mikel Arteta-a'n a midfielder pawimawh hi 100% dam a nih loh chuan chhawr luih loh a duh zawk a rinawm.

Spanish manager hian ball sem turin Fabio Vieira leh Kai Havertz te a la nei tho, an midfielder pawimawh pakhat Thomas Partey chu hliam vangin hun rei tak an chân dawn thung, player dang an inhliam leh a nih chuan coach tan a luhai thlak tawh ang.

Gunners hian season hmasa khan EPL nomawi chawi beisei viau mah se a tawpah Manchester City an ngam lo, tun season kal laiah Citizens hnuaiah an awm mek, champion an duh a nih chuan an tan chetsual a rem tawh lo.