Title Fight zan hnihna a hmuhnawm dawn

Tata SK 612 LPS Pro Fight chu zanin dar 8:00 aṭangin a hmawr bawk a ni dawn a, inhnek hmuhnawm pali a awm ang. LPS Arena, Falkland Vengah tualchhung boxing ngainatute an fuan khawm ang. TV bakah LPS YouTube-ah man chawia en theih a ni bawk.

NT Lalbiakkima a inlan dawn, tualchhung mai bakah India ram thlenga sulhnu nei ṭha Siaha boxer hi a bul ṭannaah a kir leh a, a tan Pro Fight hi thil thar a ni lo. Chhungkaw lam buaina vangin a rilru zawng zawng a pe thei lo deuh niin a lang a, zaninah erawh 100%-in a che thei ang. Vanlalenkawltira lakah Nt-a hian fiahna hautak a hmachhawn dawn a ni.

Welterweight huangah Vanlalruatpuia leh Lalruatzela Hauzel te an inbei dawn, anni pahnih hi inhnek tawk hle tura ngaih an ni. Pro Fight-a a tel vawi hnihnaah Ruatpuia'n final a luh avangin professional boxing a luhchilh thei dawn. Ruatzela hi nikum semifinal-ah tlain boxrec-a a inziah luhna hmasa berah a tlawm, chak loh nawn a duh lo ang.

Lightweight title fight bei tur C. Lalhruaitluanga (Cherhlun) leh HC Lalramfela (Chawngtlai) an intum dawn. Hruaia hian professional boxing a khelh vawi khatna tur a ni nghal a, 2015 Pro Fight bantam champion Ramfela'n ṭum nga hnehna chang tawhin vawi hnih a tlawm a, tun ṭum hi professional boxing vawi riat a khelhna tur a ni.

Vanlalawmpuia leh Gugan Kumar (Chennai) ten WBC India Super Lightweight title an inchuh dawn. Hnuhma an neih tawhah Khuangthing tlangval Awpa a chungnung zawk a, rin kai zawk a ni ang.

A tirah Awpa'n Pro Fight light title a kawl mek humhim turin rilru a siam hman a, mahse, WBC India title chuh theihna hun ṭha a neih leh tak avangin Pro Fight title kalsanin chona thar a hmachhawn dawn. Professional huanga ṭum 10 a inhnek tawhah vawi ruk chakin vawi thum a tlawm a, vawi khat draw a nei. Hetih lai hian Tamil Nadu boxer Gugan-a'n vawi thum hnehna chang tawhin vawi hnih a tlawm a, ṭum hnih a khingpui a inhnehtawkpui.