Pathianni zanah Chelsea Vs Man City

Stamford Bridge-ah Mauricio Pochettino kaihhruai Chelsea fiahin an awm dawn. November 12, Pathianni zanah Blues hian Premier League champion lai leh hmahruaitu Manchester City an mikhual ang. Poch-a hote hian match hnuhnung berah Tottenham Hotspur an sawp avangin an phur lai tak tiin sawi theih a, chutihrualin Man City hmachhawn turin an inpeih tawh em tih chu hunin a rawn hril ang.

Club lian ngamtu

Blues hian match 11 aṭangin point 15 chauh an hmu a, vawi li ngawt an chak lo tawh. Amaherawhchu, an hneh loh team hi West Ham, Nottingham, Aston Villa leh Brentford te an nih laiin club lian Liverpool (1-1), Arsenal (2-2) leh Tottenham (4-1) lakah chak loh an nei lo. Club lian laka an record hi City an hmachhawn hun atana fuihna ṭha tak a ni ang.

London club hian Premier League nomawi pawh vawi nga ngawt an chawi tawh a, inelna hnuhnung pasarihah phei chuan anmahni bakah City leh Liverpool te chauh champion thei an awm. Nomawi aṭanga teh pawhin Chelsea hi City elpha tur zinga mi an ni a, sum an hman tam bawk avangin Pep Guardiola te hming lam ruala khur nghal tur an ni lo hrim hrim.

Chelsea tan striker Nicolas Jackson-a'n match hnuhnung berah hattrick a siam a, a thlawptu Raheem Sterling leh Cole Palmer te hi City hrechiangtute an ni. Tlarhnung pui turin defensive midfielder manto pahnih Enzo Fernandez leh Moises Caicedo te an inkawp thei a, Poch-a hoten City lakah point hlawhchhuah ngei an tum ang.

City an danglam

Premier League-ah Russian pa hausa Roman Abramovich-a'n Chelsea a lei hnuah a siam lian a, nomawi chawi theih zawng zawng a chawipui. Abramovich hun a liam a, Chelsea-in neitu thar Todd Boehly neiin sum hmang tam mah se an kalphung a fuh rih lo.

Hetihlai hian Man City erawh club neitu Khaldoon Al Mubarak te ho nen an inkawp rem thlap a, manager rem hre bik Pep Guardiola an kawl bawk avangin an vanglai hun an tawng mek.

Man City hian Pep-a awm hnuah Premier League vawi sarih hmachhawnin vawi nga an champion thei a; inelna dang FA Cup (2), League Cup (4), Champions League (1), UEFA Super Cup (1) leh FA Community Shield (2) ah pawh an champion vek tawh.

Pep-a 'City'

Pep hian champion dan thuruk a hria niin a lang ber a, player ṭhahnem tak a thlak tawh chungin hma a sawn zel emaw tih mai tur a ni. Kuminah pawh inhliam vanga Kevin de Bruyne an chhawr thei lo chungin league-ah pakhatna an ni leh tawh a, UCL-ah knockout round an lut leh tawh bawk.

Old Trafford-a 3-0 ngawt an hneh zawhah Bournemouth lakah 6-1 in an chak. Cherries lakah hian Erling Haaland-a'n goal a khung lo a, inhliam vangin an la chhuak bawk. Mahse, Norwegian striker hian kar laihawl khan Young Boys a hmachhawn a, goal hnih a khung.

Haaland hmachhawpah hian Ballon d'Or a awm miau avangin nomawi a tawk lo a, che ṭha ber a nih a ngai. Norwegian striker hi hlawhtlinna duhin a tuihal a, Pep-a'n a fuih/enkawl thiam bawk avangin Chelsea tan pawh buaipui tham a tling ang.

Hei chauh hi a ni lo, player ṭha dang Jack Grealish te pawh first eleven-ah a chiang lo. Khelhna hmun chan tumin player-te an thawkrim a, player tin an hriam pha hle. Blues lakah hian Young Boys laka bench-a awm Jeremy Doku, Julian Alvarez leh Bernardo Silva te an lut a nih pawhin thilmak a ni lo ang.

Zanin an inkhelhna tur hi Stamford Bridge ni mah se City hi chak tura rinkai zawk an ni dawn a, champion nomawi chawi tura City elpui Liverpool leh Arsenal ṭantute pawhin Chelsea hi chak se an duh ngei a rinawm.