Ten Hag-a tana inkhel pawimawh

11th November, 2023

Manchester United chuan zanin dar 8:30 hian Old Trafford-ah Luton Town an mikhual dawn a, tun hnaia an result a chhiat em avangin Hatters laka an chet dan hi Erik Ten Hag-a hmalam hun hriltu a ni thei ang.

Dutch manager Ten Hag-a hnuaia season hmasa berah Man United an che ṭha a, club ṭantuten beiseina sang tak an neih hman avangin hun khirh tak an tawk mek. Manchester Derby-ah United-in an hmelma City 3-0 in an hneh lo a, hemi hnu lawk hian an mualah tho Newcastle United 3-0 bawka an hneh loh avangin League Cup aṭangin an tla.

Premier League-ah Fulham 1-0 in hneh hram mah se kar laihawl khan Copenhagen lakah 4-3 in an tlawm a, Champions League aṭanga tla thei dinhmunah an ding mek. Ten Hag-a'n player lei nana a sum hman dan thlirin Old Trafford-a Luton Town hneh chu thil awlsam tak tur niin lang mah se tun hnaia an khelh dan thlir erawh chuan chesual thei rengah an ngaih theih thung.

Goal khung tura lakluh Rasmus Hojlund-a'n Premier League-ah goal a la khung miah lo a, UCL-ah erawh goal nga khung tawh mah se a goal khungna inkhelah hian an chak lo vek. Danish striker Hojlund hian theihna sang tak a nei tih erawh chiang a, chutihrualin thlawptu a neih ṭhat tawk loh avangin kum 20 mi lek tan Man United rinrawl nih hi a harsa ve bawk ang.

Chutihrualin United buaina tak erawh tlarhnung a ni a, Ten Hag hian season ṭantirh lama a rin miah loh Harry Maguire leh Jonny Evans te a ring chho hian an buai zia a sawifiah. Copenhagen laka Diogo Dalot khelh danin Luke Shaw inhliam an tawrhzia a lantir chiang bawk.

Luton an hmachhawn hunah hliam vangin Casemiro, Tyrell Malacia, Lisandro Martinez leh Luke Shaw te a la khel thei lo vek dawn a, chutihrualin an player neih sa hi chakpui tham an ni.

Ten Hag-a hote tan fimkhur ngaihna erawh Luton hian an match hnuhnung berah Liverpool an chelh a, vanneih ṭum phei chu ni se point thum hlawh chhuak thei tur an ni. Hatters-ah hian United academy chhuak Teden Mengi leh Tahith Chong te an awm a, Premier League tawnrhiat nei ṭha Andros Townsend leh Ross Barkley te an nei bawk.