Team Dinhmun
India: Men in Blue hian November 12, Pathianni hian group match hnuhnung ber Netherlands nen an khel dawn a, an chak lo a nih pawhin pakhatna dinhmun an sawhnghet tawh.
South Africa: Proteas hian semifinal an lut chiang tawh. Nimin khan Afghanistan an hmachhawn a, NRR a ṭhat avangin hnehna a chang a nih chuan pahnihna nichungin group stage an khar a rinawm.
Australia: Aussies pawhin semifinal an lut tawh a, pathumna chinah awm chiang tawh bawk. Vawiin chawhma hian Bangladesh an hmachhawn dawn a, Aussies hian Tigers hi an sawp bakah South Africa an chak lo a nih chuan pahnihnaa awm theih dan a la awm. Chutihrualin pahnihna emaw pathumnaa awm emaw hi a pawimawh ber a ni tawh lo - semifnal-ah Australia leh South Africa an inhmachhawn dawn tih a chiang tawh.
New Zealand: Black Caps-in India an hneh loh hnuah Australia, South Africa leh Pakistan te hneh lo mah se a hun takah an rawn tho chhuak. Kane Williamson-a hote hian Sri Lanka wicket ngain an hneh a, NRR a ṭhat avangin an ke dinglamin semifinal an rap tawh. Chhiarkawp dana tlak theih dan a awm avangin Afghanistan leh Pakistan te inkhelh zawh hunah an dinhmun tih chianin a awm chauh ang.
Pakistan: Shaheens tan beiseina tlem a la awm a, semifinal lut turin vawiin hian England an sawp a ṭul dawn. Black Caps NRR chu 0.74 a nih avangin Pakistan hian an NRR chu 0.75 tlin tir a ngai ang. An bat hmasa a nih chuan 288 runs vela an chak a ngai dawn a, an vawm hmasa a nih chuan 284 ball la awmah target an umphak a ṭul ang. Shaheens tana ṭhumvawr a pawimawh a, bat hmasak a ngai dawn a, 400 runs target an chhawp bakah England hi 112 runs-a an vawm hlum vek a ngai ang.
India khingpui tur: Thilmak danglam tak a thleng a nih ngawt loh chuan Afghanistan tan semifinal luh ngaihna a awm tawh lo. Chumi awmzia chu, India-in semifinal-ah New Zealand emaw Pakistan emaw a hmachhawn dawn. Men in Blue leh Shaheens te an inhal em avangin Pakistan hian mak taka semifinal an thleng a nih chuan Eden Gardens, Kolkata-ah final khel tur zawnna hi khelh a ni ang. New Zealand zawkin semifinal an lut a nih chuan India leh Black Caps ten Wankhede Stadium, Mumbai-ah semifinal an khel ang.