India tan inpuachahna hnuhnung

Cricket World Cup inelna thlengtu India-in semifinal an lut tawh a; November 12, Pathianni chawhnu dar 2:00 hian grop match hnuhnung berah Netherlands an hmachhawn dawn. M. Chinnaswamy Stadium, Bangalore-a inkhel tur hi India tan semifinal atana inpuachahna a tih theih ang.

Tun ṭum inelnaah hian Men in Blue hi an che ṭha a, an khingpui an hneh vek a ni ringawt lo - chiang takin an chak ṭhin. World Cup hnuhnung pathum thlir let chuan inelna thlengtu India, Australia leh England te an champion a, tun ṭumah pawh Men in Blue hi champion tura rinkai an ni.

India hi inelna thlengtu an nih vang ringawta champion rinkai an ni lo a, batting leh bowling-a an ṭhat kawp avangin nomawi tura rin hlawh an ni zawk. ODI player ranking thlir chuan Shubman Gill chu batting-ah pakhatna a ni mek a, bowling lamah Mohammed Siraj a chung berah a awm mek.

Chutihrualin India team bihchian chuan bowling lamah Jasprit Bumrah hi team inngahna lungpui a la ni reng a, bowling ranking-a palina Kuldeep Yadav pawh a rintlak hle. All rounder ṭha mi Ravindra Jadeja bakah wicket la thei bik bowler Mohammed Shami te an kawl avangin bowling department pawh chhuan tham a tling.

Batting lamah Shubman Gill-a'n pressure a nei hran lo ang. A chhan chu tawnhriat nei ṭha Rohit Sharma leh Virat Kohli te an awm tlat a, Gill bakah Shreyas Iyer, KL Rahul leh Suryakumar Yadav te tan senior player-ah pawh khawvel huapa ṭha bik an awm hi vanneihna a ni.