Lewy-a'n goal khung dan a theihnghilh?

Barcelona-in nikum August thla khan goal khung thei bik striker Robert Lewandowski chu Bayern Munich aṭangin an lalut a, Polish striker hian season khatna hmang chhe lo mah se season hnihnaah erawh goal khung a harsat hle.

Kum 35 mi Lewy hian season hmasa bera La Liga an champion theih nan goal 23 a khung a, Bayern-a goal khung zat thlir chuan a tam lo. Tun season-ah Polish striker hian La Liga match 10-ah inlan tawhin goal nga chauh a la khung.

Lewy hian September 24-a Celta Vigo laka goal hnih a khung hnuah goal a khung tawh miah lo. October thla tawpa El Clasico-ah pawh Lewy hi bench-ah dah a ni a, Xavi hnuaiah rinrawl ber a ni ta lo. Catalan club hian November 12, Pathianni zan dar 8:45 hian Alaves an hmachhawn dawn a, Lewy hi mipui mit fukna tur a ni.