Bike ṭha ka khalh dawn - Marquez

Marc Marquez chuan MotoGP season thar a nghakhlel tih a sawi a, nakkumah chuan tun dinhmuna bike chak ṭha ber a khalh dawn tih a sawi. A team thar tur Gresini Racing tan a lawmawm ang, a chhuahsan tur Repsol Honda tan erawh thu hriat nuam lo a ni thung ang.

Bike intlansiakna sang ber hi season a la zo lo deuh a, champion tur pawh a la chiang lo. Pathianni chawhnu dar 12:30 hian Malaysian Grand Prix an tlan dawn, chumi hnuah Qatar leh Valencian GP an la hmabak bawk.

Spanish rider hian vawi tam tak a lo hlawhtlinpui tawh Honda a chhuahsan dawn a, contract a neih lai pawh inremsiam tawhna angin an titawp fel tawh a, team thar a nei dawn tih pawh a chiang tawh.

Kum 30 mi Marquez chuan, "Tun hnaia ka thutlukna hi thutlukna lian leh harsa tak a ni a, thutlukna siam fel hnuah pawh mahni inrinhlehna a awm hial. Bike thar nen chuan champion nghal pawh thil harsa tak a ni ang tih ka hria.

"Chutihrualin engkim mai hi beisei a thiang a, khawvela bike ṭha ber a khalh dawn avangin ka tan chuan buaina tur a awm ka ring lo. Tun season hi thlir ta ila, ka team thar tur hian bike an nei ṭha tih chu a chiang reng," a ti.

MotoGP rider championship-ah hian Francesco Bagnaia chuan point 389 hmuin hma a hruai mek a, amah hnaih bertu Jorge Martin chuan point 376 a hmu thung a, pathumnaah Marco Bezzecchi (310 points) awmin an dinhmun a la inthlak danglam thei vek.