Juve-ah Locatelli a nghet

Manuel Locatelli chuan Juventus tan kum 2028 thleng khel chhunzawm turin contract a ziak a, hun rei zawk atana inremna an nei thei hi amah leh club tan chanchin ṭha a ni ngei ang, a contract thar hian season khatah euro maktaduai 3.3 vel a hlawh ang.

Kum 25 mi Locatelli hian 2021 khan Sassuolo aṭangin Juve hi a pan. An ram Italy chu European Championship hnuhnung berah khan a hlawhtlin pui a, khawvelin a ṭhatzia an hrechiang - club lamah pawh Massimiliano Allegri tan player pawimawh a ni mek.

Turin club hian hian match 100 a khel tling der tawh a, zanin dar 10:30-a Cagliari nen an inkhelh hunah pawh hmuh pawimawh a chang ang. Old Lady hi Serie A table-ah pahnihna an ni mek, hmahruaitu Inter Milan an phak lohna chu point hnih lek a nih avangin champion an beisei ngam.

Zanin dar 7:30 hian AC Milan pawh an inlan dawn. Milan hian Champions League-ah Paris Saint Germain an hneh hlim a ni a, zanina an khingpui tur Lecce hi an huphurh hran lo ang. Forward Christian Pulisic-a'n tun hnaiah mimal training a nei thei tawh a, Lecce lakah minute rei vak lo a khel a nih pawhin a mak lo ang.