Kan harh nghal a ngai - Enrique

Paris Saint-Germain chuan zanin dar 9:30 hian Ligue 1 khel turin Reims an lenchilh dawn. PSG manager Luis Enrique chuan Champions League lamah AC Milan an hneh loh chu theihnghilhin, league match lamah theihtawp chhuah an ngai tih a sawi.

League-ah chuan Paris club hi a zawnin vawi li an chak mek a, an kaltluang viau. Chutihrualin match 11 aṭangin point 24 an hmu a, table hmahruaitu an ni phak lo, an chungah point 25 neitu Nice an awm.

Enrique chuan, "Football hi a thim zawnga thlir chuan lawmna tur a awm lo a, hawina lam apiangah buaina leh harsatna hlir a ni. Beiseina nen kan thlir a nih erawh chuan lawmna tur hlir a ni thung. Tunah pawh kan chak loh hnua kan match hmasa berah hian thawh chhuah nghal kan tum ang," a ti.

Lionel Messi leh Neymar te awm tawh lo mah se PSG hian Kylian Mbappe an la nei a, champion tura rinkai ber an la ni reng. Mahse, coach thar Enrique hnuaiah an duh leh beisei ang tak chuan an la khel chhuak thei rih lo - zaninah ṭha taka khelh an tum ang.