AIFF-in Thansangi an lawmpui

Kar liam taa All India Football Federation Executive Committee ṭhukhawm chuan, tun hnaia mipa referee fitness test paltlangtu Mizo assistant referee Lalthansangi lawmpuina thu an sawi - AIFF chuan Thansangi hi an lawmpui thu sawiin, hmeichhe football piahlamah mipa football pawh a enkawl thuai an beisei thu an sawi lang.

Football House, New Delhi-ah neih meeting-ah hian AIFF president Kalyan Chaubey chuan, India rama state leh state inelna sang ber Santosh Trophy chu tun season atan FIFA Santosh Trophy tih a nih tur thu a sawi a, FIFA president Gianni Infantino chuan final a rawn en tur thu a sawi.

Santosh Trophy final round hi February, 2024-ah Arunachal Pradesh-ah khelh tura ruahmanna siam a ni a, Mizoram pawhin kum nga hnua a vawi khat nan final round a khel dawn a ni.

AIFF Executive Committee-ah hian Arsenal coach hlui Arsene Wenger-a'n tun thla tawpa India a tlawh tur chungchang pawh sawi lan a ni a, Wenger-a ho hian FIFA-AIFF academy panga India-a din tur chu sawi ho a ni ang.

Chaubey chuan goalkeeper academy din tura hmalak a nih thu sawiin, hemi chungchangah hian Germany legendary goalkeeper Oliver Kahn a titipui thu a sawi bawk a ni.