Nov 17-ah RG Stadium grass thar hmang ṭan dawn

I League khelh nan RG Stadium, Mualpui grass a ṭhat tawk tawh loh avangin phah ṭhat a ni a, an peih fel ṭep. November 17, Zirtawpni tlai dar 4:00-a Aizawl FC-in Delhi FC an mikhual hunah official match khelh nan hman ṭan a ni ang.

Mizo club hian an match hnuhnung berah Sreenidi Deccan chu khualmualah 2-1 in an hneh a, hemi hma hian Churchill Brothers hmachhawn tur ni mah se RG Stadium peih hman a nih loh avangin Goan club nena an inkhelh hun hi sawn a ni.

Aizawl FC-in November 14, Thawhlehni hian Neroca an hmachhawn dawn a, nimin khan inkhelhna hmun tur Kolkata an pan. Manipur ram buai vangin Neroca hian Kalyani Stadium, West Bengal a hmang.

Season ṭantirha AFC bul ṭanpuitu Erol Akbay-a'n banna thehluh avangin Mizo club hi Mizo pa B. Malsawmzuala a enkawl rih a, coach thar pawh an la hnai. AFC hi I League-a sulhnu nei ṭha tak coach nen sawizawm an ni a, thuchiang a hriat thuai ang.