Cricket World Cup semifinal-ah team ṭha pali : India Vs New Zealand; South Africa Vs Australia
Cricket World Cup group stage chu nimin khan khelh zawh a ni a, inelna thlengtu India khingpui tur New Zealand a ni. Kum 2019 World Cup semifinal-ah khan Men in Blue hian Black Caps hi 18 runs-in an hneh lo a, Rohit Sharma hote hian kum 2011 World Cup nomawi an chawina hmun Wankhede Stadium, Mumbai-ah phuba lak an tum dawn a ni.
A hun takah World Cup-a record nei ṭha ber Australia an rawn che ṭha a, boruak sanga rintlak Aussies-in World Cup nomawi la chawi lo South Africa an hmachhawn dawn. Proteas hi pahnihna zawk ni mah se Aussies nen hian point 14 ve ve an hmu a, semifinal an nih tawh bawk avangin Pat Cummins hote hi an buk a rit tawh zawk hial ang.
Afghanistan an lawm tho
New Zealand-in November 9, Ningani tlaia Sri Lanka an sawp chiah kha chuan semifinal khel tur a chiang tawhah a ngaih theih a, chhiarkawp danin Afghanistan leh Pakistan ten beiseina la nei ve bawk mah se a tak ramah chuan thil tih loh ang hiala sawi theih a ni zawk.
November 10, Zirtawpniah Afghanistan-in South Africa an hmachhawn a, India laka mualpho Proteas-in insiamṭhat nan an hmang. Afghanistan hian over 50-ah 244 runs chauh an tlin a, South Africa-in Rassie van der Dussen-a'n thi loa 76 runs a siam zarah over 47.3-ah 247/5 runs siamin hnehna an chang.
Afghanistan captain Hashmatullah Shahidi chuan, "Semifinal thleng zo lo mah ila tun inelnaa kan khelh danah kan lawm. Australia kan hmachhawn ṭum khan kan kutah engkim a awm tawh a, Maxwell-a chet dan khan min ṭhawng a ni. Chutihrualin tun inelna kan hmachhawn danah hnualna tur a awm lo a, thil tak kan zir belh a ni," tiin a sawi.
A tam mah mah
Pakistan-in semifinal lut turin England an sawp a ngai a, an tan bat hmasak a pawimawh mah se ṭhumvawrh an chak lo. Shaheens hian ball 284 dah bang chungin Three Lions an hneh a ngai a, chhiarkawp danin theih mah se a tak ramah chuan a theih loh.
Champion lai England-in beisei pha lo mah se match tawp berah player ṭha Ben Stokes (84) leh Joe Root (60) te an rawn inlar a, 337/9 runs an siam. Pakistan tan semifinal lut turin ball 16 lek aṭangin hnehna a chan a ngai a, knockout stage luh beisei a tawp. Chutihrualin an tih theih hnunung chu match tawp bera chak a ni.
Shaheens tan target a tam mah mah a, bul ṭantu Abdullah Shafique (0) leh Fakhar Zaman te an che chhe bawk nen over 43.3 lekah 244 runs chauh siamin an thi fai vek. Captain Babar Azam chuan, "Kan chak loh avangin pawi kan ti hle. Chutihrualin semifinal kan luh loh chhan chu tun inkhel ni loin South Africa kan hneh loh vang zawk kha a ni," tiin a sawi a, tihsual siam ṭha tura inelna an thlir let tur thu a sawi bawk.
Hei le, Australia chu
Australia chuan group match hnuhnung berah semifinal an thlir a, Mitchell Starc leh Glenn Maxwell te an hahdamtir. Maharashtra Cricket Association Stadium-ah Aussies khingpui Bangladesh-in 306/8 runs an siam a, target pangngai tak a ni.
Mahse, Australia tan Mitchell Marsh a rawn inlar a, 177 runs a vaw chhuak a, a tawp thlengin a dam bawk. Over 44.4-ah Australia-in 307 runs an siam a, wicket hnih chauh hlohin wicket riatin hnehna an chang. Semifinal-ah double century siam thei Maxwell a rawn let ang a, Marsh-a'n inrintawkna a nei dawn bawk nen South Africa tan tum an châkawm lo khawp ang.