Injury time-ah Wolves-in Spurs lehthal

Minute 90 chhung Tottenham Hotspur-in Wolverhampton lakah 1-0 in hma an hruai a, amaherawhchu Molineux Stadium-ah mualneituin injury time-ah Pablo Sarabia leh Mario Lemina te hmangin goal hnih an khung a, Gary O'Neil-a hote 2-1 in an chak. Ange Postecoglou hote erawh match 10 chhung hneh loin nei loin kaltluang mah se kar khat chhung lekin vawi hnih an chak lo.

Season bul ṭan ṭhat avangin Spurs leh nomawi an sawizawm a, Inrinni zanah pawh bul an ṭan ṭha. Minute thumna lekah dinglam aṭanga Pedro Porro pass chu Brennan Johnson-a'n goal-ah a chantir. Spurs hian hrem vangin Cristian Romero an chhawr thei lo a, hliam vangin defender pawimawh Van de Ven, midfielder James Maddison leh forward Richarlison te an khel thei lo bawk. Inhliam ngah mah se bul an ṭan ṭhat avangin point thum a beiseiawm.

Football-ah erawh bul ṭan ṭhat aiin a tawp khar ṭhat a pawimawh a, Spurs-in goal hnihna an khung theih loh an tuar bawk. Inury minute khatnaah Matheus Cunha ball pek chu Pablo Sarabia-a'n dam dapa a lak thlak hnuah chiang zetin Wolves siphurh sutna goal a khung. Minute ruk hnuah Tommy Doyle-a'n freekick a pet thut a, Sarabia-a'n vei lam aṭanga ball la lutin a ball fing chu Mario Lemina-a'n chakna goal khung nan a hmang.

Spurs boss Postecoglou chuan, "Second half kan khel ṭha tawk lo a, chutihrualin starting eleven vawi khat channa an tam avangin ṭum danga kan khelh ang kha chu beisei ngam chi a ni lo. Chak tumin kan thawkrim a, goal kan chhuah lai avangin pawi tih a zual hle," tiin a sawi.