Newcastle an chak lo zawn

Manchester United leh Arsenal an hneh zawn hnuah Newcastle United-in Borussia Dortmund an hneh lo a, Inrinni zan khan Vitality Stadium-ah mualneitu Bournemouth 2-0 in an hneh lo. Magpies hian Premier League bakah Champions League an khel tel tawh a, Eddie Howe-a leh hoten inelna lian pahnih ṭha taka khelh kawp an harsat.

Newcastle tan Liverpool striker hlui Dominic Solanke-a'n mangchhia thlen a, kum 26 mi English striker hian inkhelh chawhma lam leh chawhnu lamah a khung. Magpies an khel ṭha tawk lo; hliam vanga Alexander Isak, Callum Wilson, Daniel Burn, Elliot Anderson, Harvey Barnes, Jacob Murphy, Matt Target leh Sven Botman bakah hrem vanga Sandro Tonali te an chhawr thei lo an tuar tih a chiang hle.

Inkhelh banah captain Kieran Trippier insum zo loin, "Inhliam eng zat nge kan neih?" tiin a chhang. Amaherawhchu, Trippier hian media hmaah erawh, "Kan chak lo a, fan-te chungah ngaihdam kandil. Kan theihna zawng zawng kan chhuah a, tun hnaia kan result avangin hlauhthawnna tur a awm lo," tiin a sawi a, international break awm chu team tan chanchin lawmawm a nih thu a sawi bawk.