Arsenal-in champion zia an lantir

Premier League-ah Arsenal-in team ṭha an ni tih lantirin Inrinni zank han Burnley 3-1 in an hneh. Gunners tana Leandro Trossard hmahruaina goal chu Clarets-in Josh Brownhill hmangin sut mah se mualneitu tan William Saliba leh Oleksandr Zinchenko ten an khung belh.

Mikel Arteta hoten match 12-ah point 27 hmuin pahnihna an awm a, Burnley an hneh ṭuma thil thleng vangin Newcastle an hneh loh danah an thinur thar bawk ang. Bukayo Saka chuan Luca Koleosho a nam hlek zawhah Clarets defender Jordan Beyer-a'n an lamah a tauh lut. Referee-in Saka chet dan hi foul-ah ngaiin goal-ah a pawmsak lo a, Newcastle an hmachhawn ṭumah erawh Gabriel chunga Joelinton chet dan VAR hmanga an en hnuah 'foul'-ah ngai a ni lo.

Goal pawm loh vangin Gunners an hnual phah lo a, chutihrualin keeper David Raya-a'n Johann Berg Gudmundsson goal khung tur a dansak chu save ṭha bik a ni. First half injury time-ah Gunners-in Trossard hmangin an khung a, Belgian forward hian goal ban sut huamin a tauh lut - a huai takzet.

Second half-ah Burnley tan Brownhill-a'n goal ṭha zet a khung a, 1-1 a ni rei lo thung. Minute 57-naah Trossard-a freekick chu box chhunga zuang sang ber Saliba-a'n a tauh lut. Declan Rice-a'n box pawn aṭangin kawh zetin a pet a, goal pawnah chiah a kal. Minute 74-naah Arsenal-in corner bawk an hmang ṭangkai a, Zinchenko-a'n scissor kick hmangin chak nemnghehna goal a khung.

Arsenal lawm a kim lo a, minute 84-naah substitute Fabio Vieira chu Brownhill a tlawh avangin hnawhchhuah a ni a, player pakhat fimkhur loh vangin 10-in an khelh phah. Mahse, Gunners an buai phah lo a, point thum hlu tak an hlawh chhuak.