Man United an la kehsawm lo

Old Trafford-ah Manchester United-in Inrinni zan khan Premier League kai thar Luton Town chu Victor Lindelof-a goal hmangin 1-0 in an hram. Erik Ten Hag-a hote hi tun hnaiah an khelh ṭhat loh avangin Dutch manager ban duhtu pawh an awm hial a, amaherawhchu point thum hlu tak an hmuh leh takah chuan tun hnaia an result hi 'chhe lailet dêr' han tih tur a ni lo.

Hliam vangin Man United an buai a, Ten Hag-a vanduaina erawh an harsatna tawh aiin an result ṭha lo a langsar zawk. Luton lakah pawh Red Devils hian goal khung an harsat a, Premier League-a goal la khung lo Rasmus Hojlund a vanduai chhunzawm zel. Danish striker Hojlund hi second half-ah hliam vanga lakchhuah a ni.

Luton-in goal venhim hna a thawk a; Hojlund bakah Marcus Rashford leh Alejandro Garnacho ten chance ṭha bik an hloh. Man United chhanhimtu chu tlarhma lam player ni loin goal venghimtu zinga mi Lindelof a ni a, Swedish defender hian box chhungah ball per chang fuhin chiang zetin Premier League-a a goal hmasa ber a khung.

Ten Hag-a naute hian vawi 15 zet shot nei mah se goal zawnah vawi li chauh a kal a, tlarhma lamah insiamṭhat an mamawh hle. Chutihrualin United tana chanchin lawmawm erawh goal an chhuah lo a, Premier League match hnuhnung pahnihah chak zawnin goal an chhuah lo ve ve bawk.

Man United hi league-ah vawi sarih an chak tawh a, Newcastle United aiin an chak tam zawk. Table chung lama awm Arsenal leh Tottenham te nena khaikhin pawhin vawi khat chauhin an chak tlem. Khelmual pawn lamah Man United tan chanchin lawmawm a awm a, Ineos neitu Sir Jim Ratcliffe chuan 25% neitu nihna a lei dawn a, club chhungah nghawng ṭha a awm beisei a ni.