Harry Kane-a'n goal a khung zel

Bayern Munich striker Harry Kane-a'n goal a khung chhunzawm a, Inrinni zan khan Bavarians-in Heidenheim 4-2 a an hneh ṭumin goal hnih a khung. England captain Kane hi Bundesliga match hmasa 11 aṭanga goal 17 khung thei hmasa ber a ni.

Allianz Arena-ah Kane-a'n goal khung turin hun a mamawh rei lo a, minute 14-naah Leroy Sane ball pek chu box chhungah vir puiin goal kilah a pet lut. English sriker hian minute 44-naah corner aṭanga ball kal chu a tauh goal leh bawk.

Awlsam takin Bayern an chak turah a ngaih theih a, mahse rinlawk ang ngawt a ni lo. Bavarians tlarhnung a pherh a, Heidenheim-in minute li chhung lekin siphurh an sut zo. Minute 67-naah Tim Kleindienst-a'n siphurh a sut ṭhen a, minute li hnuah tlarhnung ball in pass sual vangin Jan-Niklas Beste-a'n siphurh a pet goal leh bawk.

Mahse, team ṭha zawk Bayern danglamna a lang. Minute 72-naah Konrad Laimer cross chu Eric Maxim Choupo-Moting-a'n pet goal lo mah se a per chu substitute Raphaël Guerreiro-a'n a khung tho.

Bayern-in inkhel an thunun zui a, minute 85-naah Mathys Tel-a cross chu Choupo-Moting-a'n a tauh goal. Thomas Tuchel-a hote 4-2 in an chak a, Chelsea manager hlui tan lawmna tur awm bawk mah se tlarhnung pawp vangin lawm a kim lo ang.

Bundesliga inkhel dangah Borussia Dortmund-in VfB Stuttgart 2-1 in an hneh lo a, table-ah palinaah awmin Stuttgart hi pathumnaah an awm. Bayern-in match 11-ah point 29 hmuin hma an hruai a, chutihrualin nizan khan point 28 hmu tawh Bayer Leverkusen-in Union Berlin an hmachhawn a, inkhel result a zirin table a danglam thei ang.