Girona an tlo, Real chak chiang

La Liga hmahruaitu Girona an chesual duh lo - Inrinni zan khan Estadio de Vallecas-ah mualneitu Rayo Vallecano chu 2-1 in an hneh. Real Madrid pawhin Jude Bellingham tel loin Valencia 5-1 in an sawp bawk.

Girona an tlo

Catalonia club Girona hi Manchester City te nen neitu inang an ni a, City Football Group hian club neitu nihna 47% an nei. Girona hian player mal anga chhuan tur an nei lo a, an captain Uruguayan forward Cristhian Stuani hi Middlesbrough tan te pawh khel tawh a ni. Mahse Stuani hi kum 37 mi a ni tawh a, Vallecano an hmachhawn ṭum pawhin bench aṭangin a lut.

Amaherawhchu manager Michel-a hnuaiah game mawi an khel a, team angin an khel a, tun season-ah vawi khat chauh a nla tlawm. Vallecano nen an inhmachhawn ṭum hian minute ngana lekah goal an chhuah a, heti chung hian tlarhnungah ball an in pass kual a, an khelh dan nghet tak chu an hlawhtlinpui.

First half hun chanve hnu lamah chuan team ṭha zawk an ni leh tawh a, Artem Dovbyk hmanga an siphurh sutna goal pawh a mawi hle. Second half-ah Vallecano bawk an rawn che ṭha a, mahse minute 65-naah Girona-in passing game mawi hmangin Vallecano tlarhnung an ṭhiat a, Sávio-a'n a hmawr a bawk.

Real leh goal

Carlo Ancelotti-a'n Bellingham chauh ni loin Aurélien Tchouameni, Antonio Rudiger leh Kepa Arrizabalaga te a chhawr thei lo. Hliam leh hrem vanga player pawimawh an khel thei lo chungin Real Madrid-in bench-ah Luka Modric an la dah thei a, hei hian an squad chhahzia a pholang.

Santiago Bernabeu-a inkhelah Dani Carvajal-a'n mawi zetin minute thumna a khung a, 1-0 a ni nghal. Toni Kroos-a'n freekick aṭangin crossbar a pet per a, mahse Valencia pawhin minute 10 chhungin chance ṭha bik ṭum hnih an nei hman.

Real tan Vinicius Junior a hmuhnawm a, Brazilian forward hian minute 42-naah Rodrygo cross chu dive chungin a awmin a su goal - a mawi danglam hle. Mualneitu hian second half-ah pawh bul an ṭan ṭha a, Vini Jr-a'n minute 49-naah a khung. Minute khat hnuah Rodrygo-a'n Valencia keeper Giorgi Mamardashvili tihsual a khung lehnghal.

Rodrygo bawk hian minute 84-naah Valencia defender bumin Real goal ngana a khung, mikhual team-in minute 88-naah Hugo Duro hmangin goal khat an chhanglet a, 5-1 in inkhel a tawp. Real an chak chiang a, chutihrualin 1-0 a vawi ṭhnih ṭha zeta save-tu goalkeeper Andriy Lunin-a'n fak a phu hle.