Khelmuala tlu Ghana striker a thi

Ghana striker Raphael Dwamena chu Albania-a league match a khelh laiin khelmualah a tlu a, kum 28 mi striker hi doctor-ten bawihsawm mah se Kavaje Hospital an panpui laiin an thi.

Albanian league-ah kum 28 mi Dwamena hi tun season-ah top scorer a ni mek a, ram tan vawi kua khel tawhin goal hnih a khung tawh. Inrinni khan Dwamena khelhna Egnatia-in Partizani an hmachhawn ṭumin chhiatna hi a thleng.

Khawthlang media-te tarlan danin Dwamena a lung zai a ni tawh a, 'automatic defibrillator' vuah a ni tawh bawk. Kum 2017 khan Dwamena hi Brighton-in pound maktaduai 14-in lak an tum a, medical a paltlang lo. La Liga-ah Levante tan a khel tawh a, Real Zaragoza-ah loan hmangin a khel tawh bawk.

Kum 2021 khan Austria club Blau-Weiss Linz tana a khelh laiin Hartberg nen an inhmachhawn ṭumin a tlu a, hemi hnu hian ṭha chhuak lehin football career hi a chhunzawm. A hun tawp hmanna Egnatia hi December 2022 khan a zawm a, kum khat leh a chanve contract a ziak a ni.