Milan-ah Ibrahimovic a kir dawn?

Inkhelh a chawlhsan hnuah Swedish superstar Zlatan Ibrahimovic chu a inkhelh chawlhsanna AC Milan-ah a kir dawn nia sawi a ni a, mahse, boot bun ṭha leh tur erawhin a ni tawh lo ang.

Kum 42 mi Ibra hian June thla khan inkhelh a chawlhsan thu mittui nen a puang a, tunah chuan a club hmangaih em em Rossoneri nen an indawr leh mek.

Ibra leh Milan indawrna tak hi eng chiah nge a nih tarlan a ni lo a, coaching staff zinga tel tur a nih loh chuan management lamah a nih a rinawm.

Milan director Giorgio Furlani chuan, "Zlatan hi mi ropui tak, Milan ṭantute chuan kan ngainat em em a ni a, rei tak inbiakna kan nei tawh a, eng nge thleng chu kan hre thuai ang.

"Tun dinhmunah chuan eng ang taka lo kir turin nge indawrna kan neihpui sawi a rem rih lo. Mahse, champion rilru putu, mi ropui tak a ni a, Milan hi a ngaihtuah em em bawk. Eng nge thleng zel dawn chu kan hre thuai ang," a ti.

Ibra hian a vanglaiin Malmo, Ajax, Juventus, Inter Milan, Barcelona, Paris St-Germain, Manchester United, LA Galaxy leh AC Milan tan a khel a, a kalna apiangah hlawhtlinna chang mah se inkhelh a chawlhsanna leh Serie A nomawi pahnih a chawina AC Milan hi a ngaihlu bik niin a lang.