PSG chakna Mbappe-a hattrick

Kylian Mbappe chuan player ṭha danglam bik a nihna a lantir leh ta. France captain hian Inrinni zan Ligue 1 inkhelah Paris Saint Germain tan hattrick a siam a, a club hi Reims lakah 3-0 in a chakpui.

Champions League lamah PSG hian AC Milan an hneh lo hlim a ni a, an chak loh hnuah coah Luis Enrique chuan an insiamṭhat nghal a ngaih thu a sawi, a sawi ang ngeiin league match an khel ṭha hle.

Mbappe hian minute thumna lekah goal a khung ṭan a, goal keeper Yehvann Diouf dan theih lohin a volley lut. Second half-ah Carlos Soler-a through ball chu hnai takah khungin, an goal thumna turin Bradley Barcola-a siamsak a khung bawk.

PSG hi awlsam taka chak erawh an ni bik lo. Mualneitu Reims lamin na tak takin an nawr fo a, mahse goalkeeper Gianluigi Donnarumma an paltlang thei tlat lo - goal chhuah loin point thum an hmu.

PSG coach Enrique chuan, "Mbappe ṭhatzia sawi nawn fo a ngai lo a, amah ngei pawh a thlen chin aṭanga hmasawn zel turin ka fuih a, zir belh tur a neihte ka hrilh ṭhin bawk. Amah ang bawkin player dangte pawhin hmasawn an la ngai. Hmanni lawkah chesual thei kan nihna a takin a lang, chuvangin nitin inzir kan la ngai," a ti.

Paris club hian Ligue 1 match 12 aṭangin point 27 an hmu a, table hmahruaitu an ni ta - khelh zat inangah pahnihna Nice aiin point khatin an sang zawk, nomawi humhim turin inthlahdah a thiang lo.