Juve chak laiin Milan chak zo lo

Juventus chuan Gleison Bremer leh Daniele Rugani te goal hmangin Cagliari 2-1 in an hneh a, match 12 aṭanga point 29 hmuin Serie A hmahruaitu an ni lailawk.

Inrinni zan Serie A inkhel dangah AC Milan erawh Lecce nen 2-2 in an inhnehtawk a, pathumnaah an awm - nizan khan Inter Milan an inlan a, chak emaw point an hlawh chhuak hrim hrim a nih chuan hmahruaitu an ni leh nghal ang.

Massimiliano Allegri enkawl Juve hian khelmual pawn lamah buaina nei ṭhin mah se an insiamṭha leh ta hle, a zawna match ruk chhung goal chhuah loa an kal hnuah goal an chhuah ve leh ta chiah a ni.

Old Lady manager Allegri chuan, "Kan chak avangin ka lawm a, goal kan chhuah hram erawh ka ui hle. Ball pek kawngah kan fimkhur lehzual a ngai," a ti. Inter, AC Milan leh Napoli te chu anmahni aia champion rinkai zawk an nih thu a sawi bawk.

Juventus hian November 26, Pathianni zanah Inter Milan an mikhual dawn - chumi hmain international break an hmang hmasa phawt ang; Inter nen an inkhel tur hi a pawimawh dawn takzet a ni.