Hei le, Premier League inkhel hmuhnawm chu: Chelsea 4 - 4 Manchester City

Pathianni zan khan Stamford Bridge-ah Manchester City leh Chelsea ten football class sang an pho chhuak. Premier League inkhel hmuhnawm bikah goal riat ngawt a lut a, chak zawk an awm lo - penalty vawi hnih, mahni club hlui lama goal khung, injury time-a goal lut thlengin hmuh tur a awm.

City goal khung khawl Erling Haaland-a'n goal hnih a khung a, Manuel Akanji pawhin goal a khung. Chelsea tan Thiago Silva, Raheem Sterling leh Nicolas Jackson ten goal khat ṭheuh an khung a, minute 67-naah 3-3 a ni. Rodri-a'n minute 86-naah City hmahruaina goal a khung a, mikhual team hi chak turah an inngai. Mahse, thawnthu a la tawp lo - Cole Palmer-a'n a club hlui lamah si phurh sutna goal a khung.

A bul leh a tawp, Penalty

Champion lai City-in Anthony Taylor duhsakna an dawng a, Marc Cucurella-a'n Haaland a pawh avangin Chelsea-in penalty an chawi. Khelmuala thu ber leh thil thleng hmutu Anthony Taylor-a'n penalty spot a kawk miau a, VAR aṭanga ennawn ni mah se referee thutlukna sut a rem tawh lo. Chelsea ṭantu tan chuan penalty pawm harsa tak a ni thung ang.

City-in penalty hmangin hma an hruai a, Chelsea-in hun tawpah penalty hmang thoin si phurh an sut zo. Referee Anthony Taylor-a'n thil thleng a hmu chiang a, subsitute Armando Broja-a'n a phu angin Ruben Dias lakah penalty a hlawh chhuak. Thawnthu ngaihnawmna belhchhah turin penalty pet tura ball rawn latu chu Cole Palmer a ni a, Man City chhul chhuak a ni.

Kum 21 mi Palmer hian penalty hi goal-ah a chantir a, Chelsea tana goal li a khungna niin a goal khung hi penalty vek a ni. Inkhelh banah Palmer chuan, "Penalty hi a hranpain ka zir lo a, ka theihna ka ringtawk," tiin a sawi.

Palmer chu...

Chelsea hero Palmer hi City academy chhuak a ni ringawt lo a, Manchester-a piang a ni. Tun nipui bazarah khan Blues hian pound maktaduai 40-in an la lut a, a chet ṭhat dan a zirin pound maktaduai 2.5-a pung thei a ni.

City hian Palmer hi chhuahtir an duh hrim hrim a ni lo a, amahin chhuah a duh. Inkhelh hmain Pep chuan, "Chhuah a duh thu min hrilh a, kei chuan, 'Riyad Mahrez a chhuah dawn avangin chance i nei dawn,' tiin ka hrilh. Mahse, chhuah a duh tlat avangin kan chhuahtir a ni," tiin a sawi a, City duh loh ni loin City duat lai a ni.

Spanish manager hian an elpui club zawm chungchang sawiin, "Buaina ka siam ngai lo. Club hnenah ka ngaihdan ka hrilh a, club pahnih bakah player-ten rem an tih chuan kan chhuahtir mai zel. Chelsea emaw Liverpool emaw United emaw pawh ni se kan buai lo a; player leh club an hlim a, club-in player leina man an pek phal bawk chuan kei chuan buaina ka nei lo," tiin a sawi.

Stamford Bridge-ah hian Palmer chiah hi City player hlui a ni lo a, Raheem Sterling pawh a tel. Sterling hi City tlarhnung tan hnawksak a tling a, goal a khung ringawt lo - a hmuhnawm em em. Gareth Southgate-a'n tun ṭum international break-ah ko lo mah se City laka a khelh dan anga a khelh chhoh theih chuan Euro 2024-ah Sterling hian England kawr a ha ngei ang.

Chelsea theihna a sang

Chelsea hi table-ah 10-na an ni pha chauh a, league match 12 an khelh tawhah vawi li chauh la chakin vawi li an inhnehtawk a, vawi li ngawt an chak lo. Mahse, Blues hian club lian Liverpool (1-1), Arsenal (2-2), Tottenham Hotspur (4-1) leh Man City (4-4) an ngam tlat a, tun season-ah big six lakah an la tlawm lo.

Pep Guardiola pawhin Chelsea theihna a hmu. Spanish manager chuan, "Inkhelah chuan mual lai kan thunun theih chuan inkhel kan thunun tihna a ni. Mahse anni chuan Gallagher, Caicedo leh Enzo te an kawl a, Cole leh Sterling ten an rawn pui ṭha bawk. Team ṭha an ni tih hi zep tur a awm lo. Liverpool-in an hneh thei lo a, Arsenal nena an inhnehtawk khan hun tawp lamah team ṭha zawk an ni. Ka khingpui hi Chelsea an ni a, kum 25 chhunga Premier League team ṭha ber zinga mi an ni," tiin an khingpui ṭhat vanga point hnih hloh an nih thu a sawi.

Ni e, City manager sawi ang chiah hian Chelsea hi an ṭha. Moisés Caicedo leh Enzo Fernández te an awm avangin season ṭan hma kha chuan Gallagher tan hmun a awm lo ang, tih a ni. Mahse, English midfielder Gallagher hi City lakah an pathuma khel ṭha ber a ni zawk hial ang.

Poch-a'n thiam takin player a rem a, kum 39 mi Thiago Silva theihna a la sang reng a, goal a khung bakah team fuih phurtu a ni. Blues hian goal li ngawt chhuah mah se Robert Sánchez pawhin a hna thawk ṭha thawkhat hle. Chelsea hian point khat an sual chhuak a, point khat aia hlu chu City laka an khelh ṭhat avanga inrintawkna an neih belh tur hi a ni.

Inkhelh banah Poch a insum zo loin referee Anthony Taylor a an khum a, yellow card pek a ni. Argentine manager Poch-a chet dan hi a mawi hauh lo a, amah ngei pawhin hrem hi a phu thu a sawi. Mahse, Poch-a chet dan hian City an el ngam tih a tilang a, champion lai meuh an el theih chuan champion turin theihna an nei tihna a ni bawk.

City maw...

Man City erawh an theihna a sang tih chiang sa a ni a, mahse an tlarhnung a pawp reng a nih chuan nuam sain Premier League nomawi hi an humhim dawn lo. Chelsea laka chak thei dinhmuna an din hnuah penalty an chawi a, point hnih an hlohah an inngai thei ang.

International break a awm zui dawn avangin Premier League ngaina tan chuan a khawhar thlak dawn. Mahse, November 25, Inrinnia Premier League a rawn let leh hunah chuan City-in an hnuai chiaha awm Liverpool an hmachhawn dawn.

Pep-a'n City a enkawl hnua Premier League-a a elpui ber chu Jurgen Klopp-a enkawl Liverpool an ni a, season liam ta khan Reds hi chesual mah se German manager hnuaiah team thar an din. Etihad Stadium-a club pahnih inkhel tur hi a hmuhnawm khawp ang.