Number 1 ni tlang tur Djokovic

Novak Djokovic chuan mipa tennis world number 1 ni chungin kumin kum tawp a hmang tlang dawn tih a chiang ta. Serbian star hian a chung bera awm chungin vawi riat ngawt season a kharna a ni dawn a, record nei ṭha ber a ni bawk.

Italy rama awm Turin khawpuiah ATP Finals 2023 an khel mek. Pathianni zan khan Djokovic hian a group match hmasaah Holger Rune chu 7-6 (7-4), 6-7 (1-7), 6-3 in a hneh a ni.

Grand Slam vawi 24 champion tawh Djokovic hi tun hnaiah a zawnin match 19 a chak tling ta a, inelna neih laiah hian champion zo loin, a elpui ber Carlos Alcaraz chu champion pawh ni se number 1 dinhmun chhuhsak theih a ni tawh lo.

Kum 20 mi Rune tan ATP Finals vawi khat khelhna a ni a, set hmasa berah a khingpui service chhuhsakin beiseina han nei sang ve viau mah se, a tawpah erawh tawnhirat nei ṭha zawk Novak bawk a dingchang.

World number 1 Djokovic chuan, "Baseline aṭanga Rune ball rawn vuak kha a hlauhawm ṭhin em em a, a tir aṭang khan inkhel hautak tak a ni dawn tih ka hre nghal, a khel ṭha takzet a ni.

"Set khatna a awlsam lo a, set hnihna tie break kan khelh zawh chiah phei kha chuan set hnuhnung ber chu tihsual neih a thiang lo tih ka rilruah a lo lang nghal, a vannei zawkah ka ṭang zui ta a ni," tiin a khingpui a dahsang thiam hle.

A thiam leh ranking sang zual pariat inelna ATP Finals-ah hian Djokovic hi vawi ruk a champion tawh, nomawi chawi hnem lamah Roger Federer nen an inzat mek, kuminah khum theihna remchang a nei dawn.

Mipa tennis thuneitu sang Association of Tennis Professionals (ATP) chairman Andrea Gaudenzi chuan, "Number 1 ni chunga kum tawp hman hi a ropui, hetiang dinhmun vawi riat thlen phei chu ropui tak a ni. Novak hian tennis thawnthu chu sang leh ropui takin a ziak mek zel a ni," a ti.

Group match inkhel dangah tualchhung tlangval Jannik Sinner chuan Stefanos Tsitsipas lakah 6-4, 6-4 in hnehna a chang. Kum 2019 ATP Finals champion Tsitsipas a khel ṭha lo, a khingpui service a chhuhsak lo mai ni loin break point pawh a hmu miah lo.

Kum 22 mi Sinner chuan, "Player ṭha hmachhawn hi chuan mahni khelh dan phunga khelh theih a harsa ṭhin a, chumi ti thei tur chuan theihtawp ka chhuah, mahni ram ngeia ATP Finals khelh chuan min ti phurin beiseina pawh ka nei," a ti.