Aizawl FC khingpui tur Neroca

Aizawl FC chuan zanin dar 7:00 hian Kalyani Stadium, West Bengal-ah Neroca an hmachhawn dawn. Manipur ram buai vangin Neroca hian an 'home match' hi Kolkata-ah an khel ang.

Mizo club hian head coach Erol Akbay chhuah hnuah a thlakna tur an la lakluh loh avangin assistant coach B. Malsawmzuala hnuaiah an khel ang. Sawmtea hnuaia I League an khelh hmasak berah AFC hian team ṭha Sreenidi Deccan chu khualmualah 2-1 in an hneh a, hei hian inrintawkna nasa tak a pe ang.

Chutihrualin Hyderabad club laka goal ropui khungtu Rohmingthanga Bawlte chu hrem vangin a khel thei dawn lo a, match hmasa bera Mohammedan SC an hneh loh ṭuma inhliam Ivan Maric pawh a la inlan thei dawn lo. Hei vang hian tlarhnungah Lalmuanawma (Munez) kawppui turin Brazilian defender Gustavo a awm a rinawm.

Aizawl FC hian Mizo winger ṭha R. Ramdinthara leh R. Lalthanmawia te an kawl a, result ṭha an neih theih nan MPL10-a AFC goal khungtu ber Lalrinzuala'n I League-ah goal khung hna a chhunzawm a ngai. Mizo club khingpui tur Neroca hian season bul an ṭan ṭha lo a; mahse, Sreenidi (4-0) leh Gokulam Kerala (4-1) laka chiang taka an tlawm hnuah Shillong Lajong (1-1) an chelh theih avangin AFC tan fimkhur a ṭul ang.

I League inkhel dangah vawiin tlai dar 2:00 hian Shillong Lajong-in Sreenidi Deccan an mikhual dawn bawk a ni.