India - vawi kuaah vawi kua an chak

Cricket World Cup group stage chu Pathianni khan M. Chinnaswamy Stadium, Bangalore-ah khelh a ni a, India-in table mawngphaha awm Netherlands chu 160 runs-in an hneh. Rohit Sharma hote hian November 15, Nilaini chawhnu dar 2:00-ah New Zealand nen final khel tur an zawng ang a; November 16, Ninganiah South Africa leh Australia ten semifinal hnuhnung zawk an khel ang.

Inelna thlengtu India hian World Cup ṭha tak an hmang a, group stage-ah match kua khelin an chak fai vek. Men in Blue hian Netherlands chauh hi an sawp lo a; an hmelma Pakistan bakah semifinal khel tur South Africa leh Australia thlengin an sawp vek.

Century pahnih

India mipuiin Virat Kohli century siam lai hmuh an châk a, Kohli hian century a siam a nih chuan ODI-a cricket legend Sachin Tendulkar century siam zat khumin vawi 50 a siam tling chiah dawn.

Mahse, Kohli hian century a siam thei lo a, 51 runs a siam tihin pavillion-ah a kir a, inkhel entuten an duhthusam hmu lo mah se century erawh a hmu ta tho. Shreyas Iyer chuan thi loin 128 runs a siam a, KL Rahul-a'n ball 64 lekah 102 runs a siam. Rahul hi India tan World Cup-a century siam rang ber a ni.

An inthlau hret

Over 50 a zawh meuh chuan India-in 410 runs an siam a, Netherlands tan um phak chi rual a ni lo. Oranje bat hun a thleng a, Men in Blue-in vawm zir nan a hmang emaw tih mai tur a ni.

Player pakua ngawtin an vawm a, ball vuak thiam vanga lar captain Rohit Sharma leh Kohli te phei chuan wicket khat ve ve an la. Shubman Gill leh Suryakumar thlengin an vawm a, heti chung hian Netherlands hi over 47.5-ah 250 runs siamin an thi fai vek.

India-in duhthusama ṭhain group stage an khel a, a tawp ṭha takin an khar thei ang em, tih hi cricket ngainatu Hamara Desh mipui hriat châk chu a ni.