Momota champion ve leh ta

Mipa badminton world numbwer 1 hlui Kento Momota chuan nomawi a chawi ve leh ta, kum hnih hnua a champion lehna hmasa ber turin Korea Masters final-ah Koki Watanabe chu 21-16, 21-15 in a hneh.

Japanese tlangval hi tunah chuan world number 52 a ni a, inkhel loa a awm rei avangin rinkai a ni lo. Gwangju-a inkhelah hian a tir aṭangin a che ṭha hle a, harsa lutuk loin nomawi a chawi, kum 29 mi ni tawh mah se ṭha takin a inlan chhunzawm leh thei dawn niin a lang.

A vanglai chuan Momota hi khawvela a ṭha berte zinga mi a ni. Kum 2019 phei kha chuan nomawi 11 tehmeuh a chawi a, match 73 a khelh aṭangin vawi ruk chauh chak loh a nei, world number 1 pawh a ni hial reng a ni.

Mahse, vanduai thlak takin motor chetsualnaah a tel a, a mit bul sawhin zai a ngai, khua a hmu leh thei lo mai ang tih hlauhthawnna pawh a lian hman hle. Mahse, ṭha taka enkawl dam niin tun hnaiah a inkhel leh thei a, a champion leh ta hial.

Tun ṭumah hian a champion a ni satliah lo, nomawi a chawi thleng hian match vawi nga a khelhah game a hloh miah lo a ni.