Liverpool an tho leh ta

Luton Town leh Toulouse (Europa League) laka an chak zawh loh hnuah Liverpool-in an insiamṭha lehnghal tih an pholang a, Pathianni zan khan an mikhual Brentford chu 3-0 in an sawp.

Liverpool tan Mohamed Salah chuan goal hnih a khung a, Diogo Jota chuan goal khat a khung bawk - mikhual Brentford-in a chhanletna tur an nei lo a, tun season-ah Anfield-ah Reds an la tlawm lo tluang zel.

Reds tan Darwin Nunez goal khung hmasa pahnih chu offside vangin pawm a ni lo a, minute 39-naa Salah tana a siamsak erawh pawm a ni - Salah hian minute 62-naah Kostas Tsimikas siamsak chu an goal hnihna ni turin a khung zui.

Kum 31 mi Salah hian tun season Premier League-ah match 12 khelin goal 10 a khung tling leh der tawh a, assist vawi li a nei thung. Salah hi a vanneih zan ni se, hattrick siam thei hial a ni a, mahse, Trent Alexander-Arnold-a cross ṭha zet chu uiawm zetin a volley goal thei lo.

Brentford-in Bryan Mbeumo hmangin chance nei mah se season hmang ṭha tak Mbeumo-a'n a hun neih duhawm a chhawr thei lo a, player khel ṭha Alexander-Arnold chuan goal line aṭangin a lo pet chhuak hman.

Liverpool-in hnehna an chan avangin match 12 aṭangin point 27 an nei ta a, table chung ber luahtu Manchester City chu point khatin an phak lo mek - pathumna Arsenal nena an point hmuh zat a inang a, goal difference-a an ṭhat zawk avangin table chung lamah an awm.