Kan inrintawk a ngai - Stimac
India coach Igor Stimac chuan World Cup qualifier khelh hmabak atan inrintawkna an mamawh thu a sawi a, "Engtiklai pawhin a êng zawngin thil kan thlir reng tur a ni," a ti a, India tan World Cup 2026 a mitthla.
Blue Tigers hian World Cup 2026 qualifier second round chu November 16 hian an khel dawn a, khualmualah Kuwait an lenchilh ang a, November 21-ah Qatar an mikhual leh bawk ang.
2026 FIFA World Cup qualification (AFC) ah hian team 46-in inelna an hmachhawn. First round aṭangin inelna hi khelh ṭan niin, he round-ah hian ram 20, AFC ranking-a 27-46 chinte an inkhel.
Group-ah ṭhen hrang loin, ram 20-te hi double leg-in an intawng a, inkhela chak zawk ṭheuh chu second round an lut. Second round-ah hian team 36 - first round-a chakte leh AFC ranking-a 1-26 te chu an inel.
Ram 36-te hi group tinah team pali zel awmin ṭhen hran leh an ni a, an inkhelh kual hnua group tina a sang pahnihte chu third round an inpetkai ang - third round-a tlingte hi Asian Cup 2027 khel turin an tling nghal dawn.
Third round-ah hian second round paltlangtu team 18-te chu group pathumah, group tina team paruk zel awmin ṭhen hran an ni a, group pathuma a sang pahnih ṭheuh chu World Cup khel turin an tling ang.
AFC aṭang hian World Cup khel turin hmun ruak 8.1 a awm tiin a sawi theih - third round aṭangin team paruk 'direct' in an tling ang. Group pathuma pathumna leh palina ṭheuh chu fourth round-ah dah leh tur an ni.
Fourth round-ah hian group pahnihah, team pathum ve ve awmin dah leh an ni ang a, neutral ground-ah vawi khat ṭheuh an inkhel kual ang a, group pahniha a hmahruaitu ve ve chu an tling leh ang.
Group pahniha pahnihna ve ve chu fifth round-ah intawng lehin, double leg-in an inkhel ang a, he inkhela chak zawk chuan inter-confederation playoff kaltlangin chance an la nei leh dawn a ni.
A tawi zawnga sawi chuan World Cup khelh theih dan kawng a zau ta viau a, India tan pawh beisei neih ngam a ni. Second round-ah hian Blue Tigers hi group A-ah awmin, Qatar, Kuwait leh Afghanistan te nen an awm ho.
Kuminah Kuwait hi India hian vawi hnih tawng tawhin an inhnehtawkpui ve ve a, SAFF Championship final-ah khan 1-1 a an inhnehtawk hnuin, penalty-ah 5-4 in Blue Tigers an chak.
Qatar tih loh chu India tan hian harsa lutuk awm lo tura ngaih a ni a, India tan beisei tihsan ngam a ni. Stimac chuan, "Kei hi chu engtiklai pawhin ka inringtawk. Coach kan nih a, team kan kaihruai dawn a nih chuan kan inringtawk tur a ni.
"Chutiang a nih rual chuan thil hi a nihna anga thlir tel a ṭul bawk. Chu chuan insiamṭhat kan ngaihna leh siam rem turte min hriattir thei a ni. Eng ang chona nge kan hmaah inchhawp kan hriat a ṭul a, chu chu game hmachhawn dan ṭha ber a ni," a ti.
Croatian coach chuan sawi zawmin, "Game tinah hnehna chan tumin kan bei ang. Hnehna kan chang ang em, ka sawi thei lo a, mahse, theihtawp kan chhuah ang tih erawh ka sawi ngam. Qatar pawh ni se, hneh tumin kan khel ang," a ti a, tumah a hlau lo.
November 8 khan India team hi Dubai, United Arab Emirates-ah training nei turin an zin tawh a, Stimac hian player 28 a ko chhin. Player koh zingah tun hnaia coach nen inhmuthiam lo anga sawi Lalengmawia Ralte (Apuia) a tel a, Apuia nena Mumbai City tana khel Lallianzuala Chhangte a tel bawk.
Tun ṭum India squad-ah hian Stimac-a hnuaia hmun pawimawh chang ṭhin, Mohun Bagan winger Ashique Kuruniyan, Bagan defender Anwar Ali leh Kerala Blasters defensive midfielder Jeakson Singh te chu hliam vangin an tel lo.