A vawi khat nan Bastianini a chak!

MotoGP season kal lai a zo hnai a, chutihrualin a vawi khat nana hnehna chang pawh an la awm ve chauh - Bike intlansiakna sang berah rider an inel tawkin mimal che ṭha fal an awm lo tih lantirna a ni.

Pathianni tlaia tlan zawh tak Malaysian Grand Prix-ah Enea Bastianini a tlan chak ber. Ducati rider hian tun season kal laia hnehna a chan vawi khatna a ni a, a hnungah Alex Marquez a thleng thung.

Tun hnai season thum chhung ve chu rider malin fal takin MotoGP an thunun thei ngai lo, hnehna an inchan chhawk nasa. Tun season chhung pawhin rider pasarih ngawtin hnehna an chang ta a, an inel tawk hle a ni.

Ducati rider Bastianini hi season ṭanna Protuguese GP-a sprint race an neih laiin a chesual a, a dar (shoulder) a hliam. September thla khan a ban vei lam leh kerek zai a ni bawk, hei vang hian kuminah intlansiak a hmachhawn tam tawk lo.

Italian tlangval Bastianini chuan, "Hun rei tak chhung ka nghak a, tunah chuan ka tan hun ṭha a inherchhuak ve leh ta. Dawhsan (podium) lawn phak chin nih ringawt pawh hi tum ngar ngar a ngai, ka chhungte leh ṭhiante chuan tuna ka hlimna tur hi min hriatthiampui ang," a ti.

Rider championship lama hmahruaitu Francesco Bagnaia chu pathumnaah thlengin a hmahruaina a sawh nghet a, championship lama amah hnaih bertu leh a elpui ni bawk Jorge Martin chu a hnung chiahah a thleng.

Kum 26 mi Bagnaia hian pahnihna Martin aiin point 14-in hma a hruai fal mek. Intlansiak pahnih - Qatar Grand Prix leh Valencian Grand Prix te an la hmabak, intlansiak hnuhnung ber thlengin an inum zui dawn niin a lang ta.

Rider pahnih hi Sepang tlankawngah an inum na hle. Sprint race ang bawkin intlansiak takah pawh a chungnung zawk nih inchuhin an inum na viau. Martin hian vawi vawi thum ngawt tlan pelh tumin nawr ṭhin mahse Bagnaia a inveng tluan.

Bagnaia chuan, "Midang nen pawh an inel vek a, chutihrualin tun season atan chuan Martin hi a bik taka ka elpui a ni. Ani nen khan chungnung zawk nih kan inchuh na hle, a tawpa ka vannei zawk kha a pawimawh takzet.

"Intlansiak hnuhnung zawkah pawh khan kan inum nasa, ani kha pakhatna niin a hnungah ka thleng thung. Qatar leh Valencian GP kan tlan turah pawh inthlahdah a thiang dawn lo," tiin a sawi.

Bike intlansiakna sang ber hi tun season chhungin vawi 18 an tlan tawh, a vawi 19 nan November 19, Pathianni hian Losail International Circuit, Lusail-ah Qatar GP an tlan leh ang.