Al Hilal-in Neymar thlak an tum

Saudi Pro League club Al Hilal chuan hliam vanga chawl mek an striker Neymar chu squad aṭanga paih an tum a, hei hi a chhan ber chu tun season-ah a inkhelh leh an beisei tawh loh avanga ram pawn player lak belh an duh vang a ni.

Kum khata euro maktaduai 150 hlawh nia an sawi Neymar hian thla hmasa khan World Cup qualifier-ah Brazil tan Uruguay hmachhawnin, he inkhelah hian a khupah hliam a tuar a, a hliam hi zai niin, season tawp thleng chu a inlan theih a rinawm lo.

Hei vang hian Al Hilal hian tun season atan squad aṭanga Neymar paih mai an rilruk a, January transfer inhawn ruala ram pawn player thar melh an duh - Saudi Pro League-ah hian club tinin foreign player pariat aia tam an neih a thiang lo a, Al Hilal hian Neymar telin pariat an nei mek.

Neymar bakah hian Moroccan keeper lar Yassine Bounou, Chelsea defender hlui Kalidou Koulibaly, Wolverhampton Wanderers captain hlui Ruben Neves, Lazio tana hming chher Sergej Milinkovic-Savic, Fulham striker rinrawl ṭhin Aleksandar Mitrovic, Brazilian player pahnih Malcolm leh Michael te an nei.

Hetiang a nih avang hian Al Hilal manager Jorge Jesus chuan foreign left back lakluh a duh a, January-ah heti lam hi an hawi a rinawm - Neymar hi 2024-25 season-ah chuan squad-a kir leh tho tura ngaih a ni a, chuti a nih chuan January-a foreign player an lei belh chuan an squad neih saa mi an hralh leh a ngai dawn tihna a ni.